ԱԺ-ն ավարտեց սեփականության չօտարված մասի օտարման հիմքերը և ընթացակարգը կանոնակարգող նախագծի քննարկումը

Ազգային ժողովն ավարտեց «Հասարակության  պետության կարիքների համար սեփականության օտարման մասին» ՀՀ օրենքում փոփոխություն և լրացում կատարելու մասին օրենքի նախագիծը, որով առաջարկվում է սահմանել սեփականության չօտարված մասի օտարման պահանջի քննարկման կարգը, ինչպես նաև հստակեցնել դատական կարգով սեփականության օտարումը: Հիմնական զեկուցողը' ՀՀ ֆինանսների փոխնախարար Վախթանգ Միրումյանը նշեց, որ իրավական որոշակիության սկզբունքից ելնելով' ներկայումս օրենքում անհրաժեշտ է հստակ սահմանել այն դեպքերը, որոնց պարագայում սեփականության չօտարված մասի սեփականատերը իրավունք ունի պահանջելու իրականացնել օտարում: «Միաժամանակ անհրաժեշտ է սահմանել սեփականության չօտարված մասի օտարման պահանջի քննարկման կարգը, ինչպես նաև հստակեցնել դատական կարգով սեփականության օտարումը»,- ասաց Միրումյանը:

«Հասարակության և պետության կարիքների համար սեփականության օտարման մասին» Հայաստանի Հանրապետության օրենքի համաձայն, եթե օտարվում է սեփականության մի մասը, ապա սեփականատիրոջ պահանջով պետք է օտարվի այդ սեփականության չօտարված մասը ևս միայն գերակա հանրային շահ ճանաչելու մասին կառավարության որոշումն ուժի մեջ մտնելուց հետո՝ երկամսյա ժամկետում: «Մինչդեռ առաջանում են խնդիրներ, մասնավորապես՝ հստակ չեն սահմանված չափանիշները, որոնց առկայության պարագայում սեփականատերն իրավունք ունի պահանջելու չօտարված մասի օտարում»,- ասաց Միրումյանը:

Օրենքում սահմանված չէ նաև նման պահանջի ներկայացման քննարկման, ինչպես նաև պահանջի մերժման դատական վիճարկման կարգը: Դատական կարգով սեփականության օտարման առկա իրավակարգավորումը ևս կարիք ունի հստակեցման և գործի քննության ժամկետների կանոնակարգման: Փոխնախարարի խոսքով, վերոգրյալի հետևանքով սեփականատերերը չեն կարողանում արդյունավետ իրագործել սեփականության չօտարված մասի օտարումը պահանջելու իրենց իրավունքը, ինչպես նաև անհարկի ձգձգվում է օտարման ընթացակարգը, հետևաբար՝ նաև նպատակային նշանակությամբ օգտագործումը:

Սույն իրավական ակտն ընդունելու արդյունքում կկանոնակարգվեն սեփականության չօտարված մասի օտարման հիմքերը և ընթացակարգը, ինչպես նաև կհստակեցվեն դատական կարգով սեփականության օտարումը: