Փոփոխություններ են առաջարկվում «Տեղական հանրաքվեի մասին» ՀՀ օրենքում

ՀՀ փոխվարչապետ, տարածքային կառավարման նախարար Արմեն Գևորգյանն այսօր' հունիսի 19-ին, ընդունել է Հայաստանում ԱՄՆ արտակարգ և լիազոր դեսպան Ջոն Հեֆերնին: Զրուցակիցները քննարկել են նախատեսվող վարչատարածքային բարեփոխումներին, ԱՄՆ Միջազգային զարգացման գործակալության աջակցությամբ (ՄԶԳ) մարզերում իրա կանացվող ծրագրերին, ինչպես նաև թրաֆիքինգի դեմ պայքարին առնչվող հարցեր:

Փոխվարչապետը տեղեկություններ է ներկայացրել վարչատարածքային բարեփոխումների նախապատրաստման ընթացքի մասին: Նշվել է, որ մշակվում է օրենսդրական փաթեթ, մասնավորապես, փոփոխություններ են առաջարկվում «Տեղական հանրաքվեի մասին» ՀՀ օրենքում՝ տեղերում հանրաքվեների անցկացման մեխանիզմների ճշգրտման նպատակով: Նախատեսվում է, որ փաստաթուղթը կառավարություն կներկայացվի օգոստոսին:

Կառավարության առաջնահերթություններից է շարունակում լինել տարածքների համաչափ զարգացումը, և այս համատեքստում փոխվարչապետը դրական է գնահատել ԱՄՆ ՄԶԳ աջակցությամբ համայնքներում իրականացվող զարգացման ծրագրերը, որոնք նպաստում են փոքր տնտեսությունների ստեղծմանը: «Կառավարությունը խրախուսում է մարզերում փոքր տնտեսությունների, ինչպես նաև ընտանեկան ձեռնարկատիրությունների զարգացմանը, և իրականացվող ծրագրերը համահունչ են այդ առաջնահերթությանը»,-նկատել է նա:

Կողմերը քննարկել են նաև թրաֆիքինգի դեմ պայքարի ուղղությամբ կատարվող աշխատանքների, ինչպես նաև փոխվարչապետի կողմից ղեկավարվող ՀՀ-ում մարդկանց շահագործման (թրաֆիքինգի) հարցերով խորհրդի գործունեությանը վերաբերող հարցեր: Արմեն Գևորգյանն ընդգծել է, որ կառավարությունը խնդրին մեծ ուշադրություն է դարձնում: «Առաջին անգամ կառավարության ծրագրում անդրադարձ կա նաև թրաֆիքինգի խնդրին: Մենք շարունակելու են թրաֆիքինգի դեմ պայքարի աշխատանքները, և շնորհակալ ենք մեր միջազգային գործընկերներին՝ այդ աշխատանքներում մեզ աջակցելու համար»,-նշել է փոխվարչապետը:

Նա տեղեկացրել է, որ մշակվել և արդեն Ազգային ժողով է ներկայացվել համապատասխան օրենսդրական փաթեթ, որը վերաբերում է թրաֆիքինգի կամ շահագործման ենթարկված անձանց նույնացմանը, նրանց աջակցության, պաշտպանության և սոցիալական վերաինտեգրմանը: Բացի այդ, կառավարության և խորհրդի ուշադրության կենտրոնում են լինելու աշխատանքային թրաֆիքինգին վերաբերող հարցերը:

Զրուցակիցներ երկուստեք դրական և արդյունավետ են համարել այս ոլորտում ՀԿ-ների հետ սերտ համագործակացությունը և ընդգծել են երևույթի դեմ պայքարի ուղղությամբ հետևողական աշխատանքների իրականացման անհրաժեշտությունը: