«Մանվել Գրիգորյանն անուրանալի աջակցություն է ցուցաբերում»

Լուրեր.com-ի զրուցակիցն է Թաեքվոնդոյի ՀՀ ֆեդերացիայի գլխավոր մարզիչ Գևորգ Դանիելյանը: Նա անդրադառնում է Լոնդոնի օլիմպիական խաղերի մասնակից Արման Երեմյանի հնչեցրած մեղադրանքներին, թե ֆեդերացիան արդյունավետ չի ծախսում բյուջետային հատկացումները և հարակից այլ խնդիրների:

- Որքա՞ն գումար է ստանում ՀԹՖ-ն և որտե՞ղ է ծախսում:

- ՀԹՖ-ն ստանում է 18 մլն դրամ պետական աջակցության գումար, որը օրացույցային պլանի միջոցով բաշխվում է կարևորագույն միջոցառումների անցկացման համար: Անցկացվում են միջոցառումներ 4 տարիքային խմբերում՝ մեծահասակներ, մինչև 21 տարեկան երիտասարդներ, 14-17 տարեկան երիտասարդներ և պատանիներ: Անցկացվում են ՀՀ առաջնությունները, համապատասխանաբար, Եվրոպայի և աշխարհի առաջնություններ, դրանցից առաջ ուսումնամարզական հավաքներ, միջազգային մրցաշարեր: Մասնակցելու ենք նաև առաջին անգամ անցկացվող օլիմպիական քաշային կարգերով Եվրոպայի առաջնությանը:

- Վերջերս լսեցինք Արման Երեմյանին և նրա անձնական մարզչին, մասնավորապես 2013թ. աշխարհի առաջնության ժամանակ մրցավարական կողմնակալությունների մասին:

- Թաեքվոնդոն օլիմպիական մարզաձև է և խնդիր ունի մնալու օլիմպիական մարզաձև, ուստի մրցավարների միջամտությունը հասցվել է մինիմումի և բողոքարկման դեպքում կիրառվում է ռեփլեյ սիստեմը՝ պահի կրկնակի դիտումը տարբեր դիրքերի տեսախցիկներով: Աշխարհի առաջնության ժամանակ ՀՀ հավաքականի ղեկավարն ու մարզիչը եղել եմ ես և մենամարտից հետո հայտնել եմ իմ վրդովմունքը, որից հետո տեսախցիկների, նաև՝ վերևում տեղակայված անվտանգության տեսախցիկների ձայնագրության միջոցով ինձ ապացուցեցին իրենց իրավացիությունը: Ոչ ոք իրավունք չունի վարկաբեկել Թաեքվոնդոյի համաշխարհային ֆեդերացիայի աշխատանքը:

- Միայն Գրան պրիների մասնակցելո՞վ կարելի է վաստակել օլիմպիական վարկանիշ:

- Գրան պրիների մասնակցելը պահանջում է լուրջ ֆինանսական միջոցներ, բացի այդ մարզիկը պետք հաջող հանդես գա և կարողանա մտնել առաջին վեցնյակ: Եթե նախկինում ֆինանսավորել են, իսկ հիմա ոչ, նշանակում է սպորտային առումով նպատակահարմար չեն գտել շարունակել այդ ծրագիրը:

Մենք ընտրել ենք միջազգային կարևոր բոլոր առաջնություններին մասնակցելու, դրանց արդյունքների հիման վրա օլիմպիական հավաքական ձևավորելու ճանապարհը:

Ի վերջո, բոլորիս նպատակն օլիմպիական խաղերին մասնակցելն է:

- Մոտ ապագայում ի՞նչ ծրագրեր ունեք:

- Հուլիսին ֆեդերացիայի միջոցներով նախատեսվում են մինչև 21տարեկանների և պատանիների հավաքները Սևանում, որից հետո Ավստրիայում կմասնակցենք Եվրոպայի առաջնությանը: Սեպտեմբերին մեծահասակները Մոսկվայում կմասնակցեն Ջ-1 կարգի մրցաշարին, դեկտեմբերին կմասնակցենք Փարիզի բաց առաջնությանը:

Պատանիները Վրաստանում կմասնակցեն միջազգային մրցաշարի և կպատրաստվեն 2015թ. Եվրոպայի առաջնությանը:

Նախատեսվում է Իրան-Հայաստան համագործակցության պայմանագրի կնքում համատեղ ՈւՄՀ-եր կազմակերպելու և անցկացնելու համար:
Եվ ցանկանում եմ մեր զրույցի վերջում պարտադիր նշել, որ Թաեքվոնդոյի ֆեդերացիայի պատվավոր նախագահ, ԵԿՄ վարչության նախագահ, Արցախի հերոս Մանվել Գրիգորյանն անուրանալի աջակցություն է ցուցաբերում: Մշտապես և ցանկացած հարցում մենք զգում ենք նրա աջակցությունն ու հովանավորությունը: