ՕԵԿ-ը չի հրապարակում արտախորհրդարանական ուժերի հետ հանդիպումների օրակարգը

«Օրինաց երկիր» կուսակցությունն ունի սեփական քաղաքական օրակարգը' միևնույն ժամանակ փորձելով համագործակցել խորհրդարանական ու արտախորհրդարանական ուժերի հետ տարբեր հարցերի շուրջ: Այս մասին Ազգային ժողովում կայացած ասուլիսի ժամանակ հայտնեց ՕԵԿ խմբակցության քարտուղար Մհեր Շահգելդյանը: «ՕԵԿ-ի քաղաքական խորհուրդը վերջին նիստի ժամանակ հաստատեց քաղաքական գերակայության հաջորդականությունը, ինչը լինելու է ՕԵԿ գործունեության հիմքում, վերջինը վերաբերում է մեր երկրի քաղաքական, տնտեսական, սոցիալական հարցերին: ՕԵԿ վարչության նիստում կքննարկվեն այդ հարցերը, որոնք կուսակցության նախագահ Արթուր Բաղդասարյանը կներկայացնի մամուլի ասուլիսի ժամանակ»,- ասաց Մհեր Շահգելյանը:

Հարցին ի պատասխան, թե ՕԵԿ-ը համագործակցո՞ւմ է չորս ոչ իշխանական ուժերի հետ, Մհեր Շահգելդյանը նշեց, որ համագործակցության տարբեր ուղղություններ կան: «Մենք միշտ ասել ենք, որ ՕԵԿ-ը գնում է իր քաղաքական օրակարգով, բայց բազմաթիվ դեպքերում մեր մոտեցումները կարող են համընկնել ինչպես այս կամ այն հարցի առնչությամբ, այնպես էլ ընթացիկ քաղաքական գործընթացների»,- նշեց պատգամավորը:

Խոսելով արտախորհրդարանական ուժերի և քաղաքացիական նախաձեռնությունների հետ կոնսուլտացիաների մասին' Մհեր Շահգելդյանը նշեց, որ նախնական պայմանավորվածություններ ունեն արտախորհրդարանական ուժերի հետ, որը իրենք դրական են գնահատում: «Առաջիկայում հանրությունը կտեղեկացվի յուրաքանչյուր հանդիպման մասին»,- հավելեց պատգամավորը:

«Կուտակային կենսաթոշակների մասին» օրենսդրական նոր նախաձեռնության վերաբերյալ ՕԵԿ-ն ունի իր տեսակետը, մասնավորապես, պատգամավոր Հովհաննես Մարգարյանը նկատեց. «Կուտակայինի պարտադիր բաղադրիչի մնալուն մենք դեմ ենք, այն պետք է լինի կամավոր: Բացի այդ' մեզ համար անընդունելի է, որ քաղաքացիների համար հարկային բեռ ավելացնենք և տարանջատենք մեր քաղաքացիներին»: