Հայբիզնեսբանկը հատուկ ուշադրություն է դարձնում առողջական խնդիրներ ունեցող երեխաներին (լուսանկարներ)

«Երեխաների միամսյակ» ծրագրի շրջանակում Հայբիզնեսբանկը ս.թ. հունիսի 18-ին Վ. Ա. Ֆանարջյանի անվան Ուռուցքաբանության ազգային կենտրոնի Մանկական ուռուցքաբանության բաժանմունքում վերաբացեց կապիտալ վերանորոգված ցերեկային ստացիոնար սենյակը և դրան հարող միջանցքը, ինչն ավելի արդյունավետ կդարձնի բուժման գործընթացի կազմակերպումը' շնորհիվ հարմարավետ կահավորանքի և Բանկի կողմից ձեռք բերված բժշկական սարքավորումների (պերֆուզատոր):

Ցերեկային ստացիոնար սենյակում բուժվում են ինչպես երեխաները, այնպես էլ մեծահասակները:

«Հայբիզնեսբանկը, մշտապես հավատարիմ մնալով իր կարգախոսին, առանձնակի ուշադրություն է դարձնում երեխաներին, քանի որ առաջին հերթին նրանց համար է կերտվում ապագայի հուսալի ճանապարհը: Իսկ այսօր մեծ ուրախությամբ և պատրաստակամությամբ փորձում ենք օգտակար լինել հատկապես առողջական խնդիրներ ունեցող երեխաներին»,- նշում է Բանկի Վարչության նախագահ Արսեն Միքայելյանը:

Բարձր տրամադրության համար Բանկի աշխատակիցները խաղասրահի համար երեխաներին նվիրեցին խաղալիքներ և մանկական գրքեր, իսկ ստացիոնար սենյակի համար՝ հեռուստացույց:

Կարևոր է նաև այն, որ Բանկը «Շնչող պատեր» նախաձեռնության միջոցով վերանորոգված միջանցքի պատերը ներկել է մանկության տաք գույներով. հայտնի մուլտհերոսների պատկերները երեխաներին ժպիտներ կպարգևեն, իսկ պատերին փակցված երեխաների ձեռագործ նկարները, որոնք խնամքով շրջանակվել են բանկի կողմից, հիացմունքով լի ուրախություն կպատճառեն բոլորին:

Հատկանշական է, որ ծրագրի իրականացումն անմիջական կապ ունի «Հայբիզնեսբանկ» ՓԲԸ ավանդատու հաճախորդների հետ, որոնց կողմից ներդրված յուրաքանչյուր «Հուսալի ապագա» կամ «Բարի կամք» ժամկետային ավանդի գումարի 0.1%-ի չափով, բանկն իր հաշվին, փոխանցում է կատարել Ուռուցքաբանության ազգային կենտրոնի հատուկ հաշվին և գոյացած միջոցներով էլ նախաձեռնել է բարի գործ երեխաների համար: