Միքայել Մելքումյանը շրջանառության հարկի դրույքաչափը նվազեցնող նախագիծը սպասված է համարում

Շրջանառության հարկի նվազեցման և ընտանեկան բիզնեսին հարկային արտոնություններ տվող օրենսդրական փաթեթը սպասված էր շատերի կողմից, սակայն կան խնդիրներ, որոնք շտկման կարիք ունեն: Այս մասին «Շրջանառության հարկի մասին» ՀՀ օրենքում փոփոխություններ և լրացումներ կատարելու և հարակից նախագծերի օրենսդրական փաթեթի քննարկման ժամանակ նշեց ԲՀԿ խմբակցության պատգամավոր Միքայել Մելքումյանը: «Ես պետք է ասեմ, որ այս խնդիրները մեր կուսակցության նախընտրական ծրագրում ընդգրկված են, և հիմա մենք ողջունում ենք, որ կառավարությունը նման օրենսդրական նախաձեռնություն է ներկայացրել, սակայն այստեղ կան որոշակի խնդիրներ, որոնց հետ մենք համաձայն չենք»,- ասաց Մելքումյանը:

Պատգամավորն ընդգծեց, որ շրջանառության հարկի ներմուծումն էականորեն բարձրացրեց հարկային բեռը, և 3.5 տոկոսից այն 1.5 տոկոս դարձնելու կառավարության նախաձեռնությունը շատ կարևոր է: «Ընդամենը 1.5 տարի է անցել այն պահից, երբ մենք ներմուծեցինք շրջանառության հարկը, սակայն տեսնում ենք, որ այդ օրվանից մինչև հիմա մեր երկրում շուրջ 6000 փոքր և միջին օբյեկտներ փակվել են, ուստի անհրաժեշտ էր համապատասխան քայլեր ձեռնարկել: Ես առաջարկում են ընդհանրապես այդ 1 տոկոսն էլ վերացնել և ազատել շրջանառության հարկից»,- ասաց նա:

Անդրադառնալով օրենսդրական փաթեթում ամրագրված վարչարարության վերաբերյալ դրույթին, ըստ որի ընկերությունները պետք է համապատասխան փաստաթղթավորում ներկայացնեն իրենց գործունեության վերաբերյալ, ինչպես նաև ընկերություններում պետք է պարբերաբար ստուգումներ անցկացվեն՝ Մելքումյանն ընդգծեց, որ սա էլ խնդրահարույց է, քանի որ շատ դժվար կլինի շուրջ 39 հազար օբյեկտներում ստուգումներ իրականացնելը: «Սա կարող է լրացուցիչ խնդիրներ առաջացնել փոքր և միջին սուբյեկտների համար, մենք առաջարկում ենք նաև այս հարցին անդրադառնալ և վերանայել վարչարարության մասին դրույթը»,- նկատեց Մելքումյանը:

Պատգամավորը ողջունում է նաև ընտանեկան բիզնեսին հարկային արտոնության տրամադրման որոշումը, սակայն բավարար չի համարում տարեկան 12 միլիոն դրամ եկամտի շեմը: Նա առաջարկում է բարձրացել այս շեմը՝ հասցնելով այն 20-25 միլիոնի՝ վստահություն հայտնելով, որ մի քանի տարի հետո այս շեմը բարձրացնելու անհրաժեշտություն կառաջանա: «Մենք ողջունում ենք այս նախաձեռնությունը, կողմ ենք «ընտանեկան բիզնես» հասկացության սահմանմանը, սակայն հարկային արտոնություններ տրամադրելու համար եկամտի 12 միլիոն դրամ շեմը պետք է բարձրացնել, որովհետև համոզված եմ ՝ հետագայում մենք նման խնդրի առջև կանգնելու ենք, ուստի մենք հանգիստ կարող ենք դա հիմա անել»,- նշեց ԲՀԿ խմբակցության ներկայացուցիչը:

Ազգային ժողովը քննարկում է «Շրջանառության հարկի մասին» ՀՀ օրենքում և հարակից օրենքներում փոփոխություններ և լրացումներ կատարելու մասին օրենսդրական փաթեթը, որով առաջարկվում է նվազեցնել շրջանառության հարկի դրույքաչափը և հարկային արտոնություններ տրամադրել ընտանեկան բիզնեսին: