Արտեմ Ասատրյանը ներկայացրեց կուտակային կենսաթոշակների մասին օրենքի նոր նախագիծը

ՀՀ աշխատանքի և սոցիալական հարցերի նախարար Արտեմ Ասատրյանը ներկայացրեց կուտակային կենսաթոշակների մասին օրենքում կատարված փոփոխությունները, որի վերաբերյալ նախագիծն արդեն պատրաստ է և ներկայացվել է Ազգային ժողովի քննարկմանը: Ազգային ժողովում համապատասխան օրենքի նախագծի քննարկման ժամանակ Արտեմ Ասատրյանը տեղեկացրեց, որ օրենքի նախագծի ընդունումից հետո քաղաքացիներն արդեն կկատարեն ոչ թե պարտադիր կուտակային վճարներ, այլ սահմանվելու է նպատակային սոցիալական վճար, որը կմուտքագրվի պետական բյուջե: «Մենք այստեղ սահմանել ենք նաև աշխատավարձի առավելագույն շեմը, որը 500 հազար դրամ է, և արձանագրել ենք, որ այդ դեպքում քաղաքացին իր աշխատավարձին համապատասխան կենսաթոշակ ստանալու համար պետք է կատարի 25 հազար դրամի նպատակային սոցիալական վճար»,- ասաց նա:

Նախարարը նշեց նաև, որ այս տարվա հուլիսի 1-ից պետական հատվածում աշխատավարձերի էական բարձրացում կլինի, ինչը նշանակում է, որ սահմանված սոցիալական նպատակային վճարը լրացուցիչ բեռ չի լինի քաղաքացիների վրա: «Քանի որ բարձրանալու են պետական հատվածի աշխատավարձերը, մենք որոշել ենք, որ այս նախագիծը տարածվելու է միայն պետական հատվածում աշխատող քաղաքացիների վրա, ովքեր ծնվել են 1974թ.-ից հետո»,- պարզաբանեց նախարարը՝ ընդգծելով, որ մասնավոր հատվածը կարող է կամավոր կերպով միանալ համակարգին կամ հրաժարվել դրանից:

Արտեմ Ասատրյանը տեղեկացրեց, որ մասնավոր հատվածի աշխատողների համար նպատակային վճարը կամավոր կլինի մինչև 2017թ.-ը:

Ի պատասխան Էդուարդ Շարմազանովի հարցադրմանը՝ Արտեմ Ասատրյանը հայտարարեց, որ կարելի է արձանագրել, որ օրենքի ընդունումից հետո այն տարածվելու է միայն պետական աշխատողների վրա, իսկ մասնավոր հատվածի աշխատողները կարող են միանալ կամ հրաժարվել կուտկային համակարգից: Արտեմ Ասատրյանն ընդգծեց, որ այս նախագծով կառավարությունը համապատասխանեցրել է կուտակային կենսաթոշակների մասին օրենքը ՀՀ Սահմանադրությանը, ինչպես նաև ականջալուր է եղել քաղաքացիների բողոքներին և մտահոգություններին: