Մեզ դասեր մի տվեք, ո՞վ է որոշել՝ կարդացած ենք, թե կարդացած չենք. Շարմազանով

Ազգային ժողովի փոխնախագահ Էդուարդ Շարմազանովը «Կուտակային կենսաթոշակների մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ արտահերթ ելույթ ունեցավ, որում անդրադարձավ ոչ իշխանական ուժերի պատգամավորների հնչեցրած քննադատություններին և իշխանության հասցեին վիրավորանքներին:

Շարմազանովն ընդգծեց, որ իր մեջ տպավորություն է ստեղծվել, որ իրենք գտնվում են ոչ թե հայոց խորհրդարանում, այլ տարրական դպրոցում, որտեղ իրենք ունեն բազմաթիվ ուսուցիչներ, իսկ քաղաքական մեծամասնության ներկայացուցիչներն էլ աշակերտներ են: «Հարգելի՛ բարեկամներ, մենք շատ հարգում ենք և′ ձեր տարիքը, և′ փորձը, և′ ծառայությունները հայրենիքի հանդեպ, սակայն խնդրում եմ մեզ դասեր մի տվեք: Ի՞նչ է նշանակում գաք այստեղ 70 հոգու դաս տաք՝ այսպես պետք է լինի կամ այնպես պետք է լինի»,- ասաց Շարմազանովը:

ԱԺ փոխխոսնակն ընդգծեց, որ քաղաքական բազմակարծությունը պառլամենտարիզմի բաղկացուցիչ մասն է, և իրենք հարգում են այդ բազմակարծությունը: «Մենք որևէ մեկին չենք վիրավորում և դասեր չենք տալիս: Մենք բնական ենք վերաբերվում, որ ոչ իշխանական քաղաքական ուժերի կարծիքները մեր կարծիքի հետ չեն համընկնում: Բայց գալ և այս ամբիոնից դասեր տալ, ասել, որ կարդացած չեք, անընդունելի է: Այդ ե՞րբ եք ստուգել և ո՞վ է որոշել՝ կարդացած ենք, թե կարդացած չենք»,- նշեց Շարմազանովը:

Անդրադառնալով պատգամավորներից մեկի դիտարկմանը, թե քաղաքական մեծամասնության պատգամավորների մեջ Արծվիկ Մինասյանի նման 5 պատգամավոր հնարավոր չէ գտնել՝ Շարմազանովն ընդգծեց, որ ինքը Արծվիկ Մինասյանին շատ հարգում է, ով խելացի և հայրենասեր պատգամավոր է: «Սակայն արդյոք քաղաքական ամբիոնին հարի՞ր է այդ տոնով խոսելը: Որևէ մեկը քաղաքական մեծամասնությունից այս տարիների ընթացքում իրեն թույլ տվե՞լ է քաղաքական փոքրամասնության մասին նման ոչ կոռեկտ արտահայտություն անել»,- ասաց նա:

Անդրադառնալով երկրի՝ կործանման եզրին գտնվելու մասին մի շարք պատգամավորների դիտարկումներին՝ ԱԺ փոխխոսնակն ընդգծեց. «Մեր մոտալուտ կործանման մասին լուրերը փոքր-ինչ չեն համապատասպանում իրականությանը: Մի խոսեք այդ տոնայնությամբ: Չի կարելի»,- ասաց նա՝ կոչ անելով նաև չմեկնաբանել Սահմանադրական դատարանի որոշումերը:

Շարմազանովն ընդդիմադիրներին կոչ արեց չնյարդայնանալ և հանգիստ լինել: «Միգուցե երեկ ձեր քաղաքական ծրագրերը ձախողվեցին, միգուցե ձեզ նյարդայնացնում է այն, որ երեկ քաղաքական մեծամասնությունը շատ արագ քվորում ապահովեց և սկսեց հանգիստ աշխատել, և դուք հասկացաք, որ պատմական հաջողություններ չի կարելի ակնկալել, հիմա դուք օրենսդրական նախաձեռնությունից խոսելու փոխարեն վիրավորում եք: Մի վիրավորեք, խնդրում եմ ձեզ: Ապակե տան մեջ ապրողը ուրիշի վրա քար չի նետում, որովհետև ապակե տունն այդ դեպքում կփշրվի»,- նշեց Շարմազանովը:

ԱԺ փոխնախագահը հիշեցրեց նաև, որ քաղաքական փոքրամասնությունը երբեք որևէ երկրում որոշումներ չի ընդունում: «Եթե դուք ցանկանում եք՝ ձեր 12 կետ լինի, 50 կետ լինի, թե 100 քայլ, իրականանա, մասնակցեք ընտրություններին: Ընտրությունները կգան՝ բարին էլ հետը: Եվս մեկ անգամ հորդորում եմ բոլորին' լինել կոռեկտ, չանցնել սահմանները և դասեր չտալ, դուք վարժապետ չեք, մենք էլ աշակերտ չենք»,- եզրափակեց Շարմազանովը: