Կենսաթոշակային բարեփոխումների կառավարության նոր նախաձեռնությունը հանրային կյանքի համար բացառիկ կարևոր է. Խոսրով Հարությունյան

Ազգային ժողովի ՀՀԿ խմբակցության պատգամավոր Խոսրով Հարությունյանը կուտակային կենսաթոշակների մասին նոր օրենսդրական փաթեթը հանրային կյանքի առաջընթացի համար բացառիկ կարևոր նախաձեռնություն է համարում: Ազգային ժողովում «Կուտակային կենսաթոշակների մասին» ՀՀ օրենքում փոփոխություններ և լրացումներ կատարելու մասին օրենքի նախագծի քննարկման ժամանակ նա նշեց, որ կառավարության այդ նախաձեռնությանը նախորդել են բազմաթիվ քննարկումներ, առարկայական վերլուծություններ: «Այդ քննարկումների և վերլուծությունների արդյունքում մենք արձանագրել ենք, որ կենսաթոշակային բարեփոխումները անհրաժեշտություն են մեր երկրի համար, ինչպես նաև արձանագրել ենք, որ այդ բարեփոխումները պետք է լինեն ընդգրկուն: Եվ ես կարծում եմ, որ կառավարությունն այս նախաձեռնությամբ կատարել է առաջին քայլը»,- ասաց Հարությունյանը:

Խոսրով Հարությունյանը կարծիք հայտնեց, որ կառավարությունը, նոր նախագիծը մշակելիս, հաշվի է առել քաղաքական փոքրամասնության, ինչպես նաև հանրության կարծիքը: «Քաղաքական փոքրամասնությունը ժամանակին առաջարկում էր օրենքի կիրառումը հետաձգել 6 ամսով, իսկ հիմա կառավարությունը հետաձգում է 3 տարով: Այո, ըստ էության կառավարությունը մինչև 2017թ. հետաձգում է այս համակարգի կիրառումը»,- նշեց պատգամավորը:

Նա ընդգծեց, որ օրենսդրական այս փաթեթն առաջին հերթին ուղղված է երկրում քաղաքացիական ծառայության առաջընթացի ապահովմանը: Պատգամավորը նշեց, որ քաղաքացիական ծառայության համակարգը մրցունակ չէ, և պետությունը պետք է քայլեր ձեռնարկի այն մրցունակ դարձնելու ուղղությամբ, որի համար առաջնահերթ է քաղաքացիական ծառայողների կարիերայի առաջընթացի համար կանխատեսելի պայմաններ և ապագայի համար սոցիալական երաշխիքներ ստեղծել: «Եվ կառավարությունն այս նախագծով հենց սոցիալական երաշխիքներ ստեղծելու քայլ է անում: Կառավարությունն ասում է, որ հուլիսի 1-ից էականորեն բարձրացնում է պետական բյուջեից սնվող աշխատող քաղաքացիների աշխատավարձերը և դրա շրջանակներում իրեն իրավունք է վերապահում նրանց համար սոցիալական ապահովության երաշխիքներ ստեղծել ապագայի համար՝ նրանց հետագա կենսաթոշակի համար սահմանելով սոցիալական նպատակային վճարի ինստիտուտը»,- ասաց ՀՀԿ պատգամավորը:

Պատգամավորն ընդգծեց, որ կառավարությունը որոշել է քայլ առ քայլ իրականացնել կենսաթոշակային բարեփոխումները, և նախագծի այս տարբերակն ընդունելի է: «Եվ պետք է համաձայնեմ այն կարծիքների հետ, որ նախագիծը լրամշակման կարիք ունի, սակայն ընդհանուր բովանդակությունը շատ հստակ է և ընդունելի»,- եզրափակեց Հարությունյանը: