Գագիկ Բեգլարյանը բոլոր ցանկացողներին հրավիրեց ծանոթանալու Հյուսիս-Հարավ ճանապարհային միջանցքի ծրագրին

Հյուսիս-Հարավ ճանապարհային միջանցքի ներդրումային ծրագիրն ունի ազգային և պետական նշանակություն, և որևէ անհատ իրավունք չունի վարկաբեկելու այն աշխատանքը, որն արվել կամ արվում է: Այս մասին լրատվամիջոցների և ծրագրով հետաքրքրված կառույցների համար կազմակերպված շրջայցի ժամանակ ասաց ՀՀ տրանսպորտի և կապի նախարար Գագիկ Բեգլարյանը: Նա բոլոր ցանկացողներին հրավիրեց ծանոթանալու ծրագրի աշխատանքներին և ստանալու իրենց հուզող հարցերի պատասխանը: «Յուրաքանչյուր անձ' լինի նա լրատվամիջոցից, հասարակական կազմակերպությունից, գերատեսչություններից, թե այլ շահագրգիռ կառույցից, կարող է այցելել ծրագիրը համակարգող մարմին և ստանալ բոլոր հարցերի պատասխանները: Մենք պատրաստ ենք պատասխանել յուրաքանչուրի հարցի, որովհետև Հյուսիս-Հարավ ծրագիրն ունի պետական մեծ նշանակություն և, ինչու չէ, նաև ազգային նշանակություն: Ես չեմ ուզում, որ հասարակական կազմակերպությունների ղեկավարները կամ պատգամավորները, որոնք ուզում են իրենց անձը կայացնել և ներկայանալի լինել լրատվամիջոցներին, վարկաբեկեն այս ծրագիրը: Անկախ նրանից, թե ով է աշխատում այս ծրագրում և ով ինչ պաշտոնի է, այս շարունակում է մնալ ազգային ծրագիր, որը միտված է մեր տնտեսության զարգացմանն ու կայունությանը»,- ասաց Բեգլարյանը:

Նա նշեց, թե մամուլում տեղ գտած այն հրապարակումները, որոնց համաձայն' ծրագրի իրականացման համար մսխվել է ավելի քան 900 մլն դոլար, չի կարող համապատասխանել իրականությանը: «Սա խելագար հայտարարություն է: Համոզվելու համար Հայաստանի յուրաքանչյուր քաղաքացի կարող է դիմել մեզ և ստանալ ցանկացած հարցի պատասխան: Մենք աշխատելու ենք բաց և թափանցիկ, քանի որ սա մեր բոլորի ծրագիրն է, և ես չեմ ուզում, որ ծրագրի հետ կապված լինեն անհեթեթ հայտարարություններ: Ոչ մեկին վերապահված չէ պետության գումարները ծախսել աննպատակ և չարաշահումներ անել»,-ասաց նա խարարը: