«Դեղերի մասին» նոր օրենքը հստակեցնելու է կեղծ դեղերի դեմ պայքարը. դեղ գնելու համար դեղատոմս է պահանջվելու

«Դեղերի մասին» նոր օրենքը հստակեցնելու է կեղծ դեղերի հետ կապված պայքարը, ինչպես նաև ցանկացած դեղ գնելու համար դեղատոմս է պահանջվելու: «Նոր օրենքն ամբողջությամբ ընդգրկում է դեղերի շրջանառության կարգավորման ոլորտը` դեղի կլինիկական փորձարկումներից սկսած մինչև գրանցում, արտադրություն և շրջանառություն դեղատնային ցանցում` ապահովելով դեղի հիմնական ցուցանիշները, որոնք վերաբերում են որակին, անվտանգո ւթյանը, արդյունավետությանը և պահպանմանը: Նոր օրենքը տարբերվում է հնից նրանով, որ ավելի ժամանակակից է, ավելի խորն ու ճշգրտությամբ ընդգրկում է ոլորտը, ավելի հստակեցված է»,- լրագրողների հետ զրույցում նշեց «Դեղերի և բժշկական տեխնոլոգիաների փորձագիտական կենտրոն» ՓԲԸ տնօրեն Հակոբ Թոփչյանը:

Նրա խոսքով` նոր օերնքը նախատեսում է դրույթներ նաև կեղծ դեղերի վերաբերյալ, ինչն այսօր խիստ արդիական է: Թեև Հայաստանը համեմատաբար զերծ է մնացել կեղծ դեղերի շրջանառությունից` շուկայի փոքրության շնորհիվ, բայց վերջին տարիներին մեր երկրում ևս հայտնաբերվել են կեղծ դեղեր` ինչպես անմիջական շուկայում, այնպես էլ մաքսային գոտիներում: «Անցած տարի 4-5 կեղծ դեղ է հայտնաբերվել շուկայում: Այս օրենքը հստակեցնում է կեղծ դեղերի դեմ պայքարը: Կեղծ դեղերի շրջանառությունը քրեականորեն պատժվում է: Կան չգրանցված դեղեր շուկայում: Այս օրենքով նաև ներկայացնելու են կեղծ և չգրանցված դեղերի տարանջատման դրույթները»,- հավելեց Թոփչյանը:

Նոր օրենքով` ցանկացած դեղի համար դեղատոմսը պարտադիր է լինելու: Փորձագետի գնահատմամբ` դա անհրաժեշտ է դաշտի արդյունավետ վերահսկողությունն իրականացնելու համար: «Դեղատոմսի առկայությունը մեկ աստիճանով կբարձրացնի առողջապահության որակը»,- համոզված է Թոփչյանը: