«Ադրբեջանը պատրաստ չէ երկխոսության». Կորյուն Նահապետյանի տպավորությունները ՆԱՏՕ-ի սեմինարից

ՆԱՏՕ-ի Խորհրդարանական վեհաժողովի Ադրբեջանում կայացած Rose Roth 84-րդ սեմինարին մասնակցած ՀՀ պատվիրակությունը արդյունավետ կատարել է իր գործառույթը` ներկայացնելով ՀՀ դիրքորոշումը Լեռնային Ղարաբաղի հակամարտության կարգավորման և օրակարգային մյուս հարցերի վերաբերյալ:

Ազգային ժողովում կայացած ասուլիսի ժամանակ այս մասին հայտնեց ՆԱՏՕ-ի ԽՎ-ում ՀՀ ԱԺ պատվիրակության ղեկավար Կորյուն Նահապետյանը:

Նրա դիտարկմամբ` Հայաստանի մասնակցությունը ՆԱՏՕ-ի սեմինարին չափազանց կարևոր էր: «Եթե մասնակցության որոշում չկայացվեր, ապա սեմինարին վակուումային իրավիճակ կստեղծվեր, որից օգտվելով` ադրբեջանական կողմը թյուր պատկերացում կձևավորեր տարածաշրջանում անվտանգության խնդիրների շուրջ` չհանդիպելով որևէ հակազդեցության»,- ասաց պատգամավորը` հավելելով, որ ադրբեջանական կողմի քարոզչությունը և ապատեղեկատվության տարածումը նորություն չէ, իսկ նման հարթակներում Հայաստանի դիրքորոշումների ներկայացումն ու պաշտպանությունը` չափազանց կարևոր է:

«Իհարկե, ավելի նպատակահարմար կլիներ, որ նման միջոցառումներ չանցկացվեին մարդու իրավունքները խախտող երկրներում»,- ավելացրեց նա:

Կորյուն Նահապետյանի խոսքով` Ադրբեջանում մթնոլորտը շատ լարված էր` հաշվի առնելով այն, որ ադրբեջանական պատվիրակությունը ցանկացած հարց աղավաղում ու տեղադրում է իր` որպես «զոհի», ու Հայաստանի` որպես «ագրեսորի» իր բանաձևի շրջանակներում:

«Հաջորդ հետևությունը, որ կուզենայի բարձրաձայնել, այն է, որ Ադրբեջանը պատրաստ չէ երկխոսության: Նրանք բոլոր հարթակները օգտագործում են հայկական կողմին ևս մեկ անգամ վարկաբեկելու և հետագա քննարկումները որպես ապարդյուն ներկայացնելու համար: Ադրբեջանական կողմը որևէ հիմնավոր փաստարկ չէր ներկայացնում մեր դիտարկումներին, նրանք միայն փորձում էին երկխոսությունը վերածել լարված բանավեճային ընդհարման` ուղեկցելով դրանք պետության և առանձին անձանց ուղղված վիրավորանքներով»,- շեշտեց Կորյուն Նահապետյանը` փաստելով, որ այլ երկրների պատվիրակները ¨ պարզապես դիտորդի դերում էին:

Նա նկատեց, որ Ադրբեջանում անցկացված Rose Roth սեմինարին բավականին քիչ թվով ներկայացուցիչներ էին մասնակցում այլ երկրներից: «Սա մի ֆորում է, որի ժամանակ քննարկվում են գլոբալ ու տարածաշրջանային անվտանգության խնդիրներ, որին մասնակցում են ինչպես ՆԱՏՕ-ի ԽՎ անդամեր երկրների, այնպես էլ գործընկեր երկրների ներկայացուցիչներ: Այս միջոցառման մասնակիցների տեսանկյունից պետք է նշեմ, որ, ի տարբերություն բոլոր Rose Roth սեմինարների, այս մեկին այլ երկրների մասնակիցները բավական քիչ էին: Այլ երկրների մասնակիցները քննարկումներին մասնակցելու առումով էլ բավա կան պասիվ էին. դա պայմանավորված էր ադրբեջանական պատվիրակների ոչ պատշաճ վարքագծով»,- նշեց Կորյուն Նահապետյանը:

ՆԱՏՕ-ի ԽՎ Rose-Roth 84-րդ սեմինարին մասնակցելու համար Բաքու էին մեկնել Հայաստանի խորհրդարանի պատգամավորներ` ՆԱՏՕ-ի ԽՎ-ում հայկական պատվիրակության ղեկավար Կորյուն Նահապետյանը, «Ժառանգություն» կուսակցության խորհրդարանական խմբակցության քարտուղար Թևան Պողոսյանը և Երևանում Ռազմավարական հետազոտությունների կենտրոնի ղեկավար Ռիչարդ Կիրակոսյանը: