«Հակառակորդն անընդհատ լարվածություն է ստեղծում». Սեյրան Օհանյան

Մենք ունենք հակառակորդ, որը հրաժարվում է վստահության մթնոլորտ ստեղծելուց և անընդհատ լարվածություն է ստեղծում: Այդ պայմաններում մենք անընդհատ նրա հետ շփվում ենք, անընդհատ փոխադարձ կրակոցներ են հնչում: Այս մասին լրագրողների հետ ճեպազրույցում նշեց ՀՀ պաշտպանության նախարար Սեյրան Օհանյանը:

«Անկասկած մենք ձգտում ենք պահել հրադադարի իրավիճակը և ձգտում ենք միայն կամ կանխարգելել, կամ պատասխանել: Այսօր միջադեպ է տեղի ունեցել պաշտպանության բանակում` հակառակորդի կողմից զինծառայող է զոհվել և նաև այլ միջադեպ ունենք այլ սահմանային զորամասում` զենքի օգտագործման հետ կապված: Հիմա հարուցված է քրեական գործ, հետաքննությունը տարվում է, և կարծում եմ, որ հանգամանքները կպարզվեն և կիմանանք` ինչն է պատճառը: Նախնական տվյալներով` զենքի օգտագործման կանոնների խախտում է եղել: Ցավակցում եմ բոլոր հարազատներին»,-  նշեց Սեյրան Օհանյանը:

Լեռնային Ղարաբաղի Հանրապետության զինված ուժերում պայմանագրային զինծառայող է զոհվել` ԼՂՀ քաղաքացի Նարեկ Պողոսյանը: ԼՂՀ ուղղությամբ ադրբեջանական զինուժը հերթական դիվերսիոն ներթափանցման փորձն է արել: Հակառակորդը նահանջել է` ունենալով կորուստներ: Հավանաբար դրանով է բացատրվում ադրբեջանական լրատվամիջոցներում առկա ապատեղեկատվությունն այն մասին, իբր, հայկական զինուժը փորձել է ներթափանցել Թովուզի շրջան: Ադրբեջանական քարոզչամեքենան կրկին իր չհաջողված ոտնձգությունը փորձում է վերագրել հայկական կողմին, իսկ սեփական հասարակության աչքո ւմ սխալները սրբագործելու համար ստեր է հորինում` արդարացնելու, թե ինչ հանգամանքներում են մահացել իրենց զինծառայողները: Նրանք այսօր տեղեկություն են հրապարակել, որ ադրբեջանական բանակում զինծառայողը կրակել ու սպանել է ծառայակիցներին, ապա ինքնասպանություն գործել: