«Հրապարակ». Ճգնաժամը հառնեց իշխանության առջև

Այն ճգնաժամը, որի մասին ժամանակին ասում էինք-գրում էինք, ԱԺ այս արտահերթում ցցուն եւ անթաքույց հառնեց իշխանության առջեւ: Պարզվեց՝ որքան էլ ընտրություններ կեղծես եւ «որակյալ մեծամասնություն» ապահովես քեզ համար, մի օր գալիս է խորհրդարանական ճգնաժամի պահը, երբ մի քանի հոգու բացակայության պատճառով այլեւս կոճակ սեղմողների անհրաժեշտ բազմությունն ապահովել չես կարողանում, երբ մեծամասնությանը ԱԺ հրավիրողի դիրքերի թուլացումը նշանակում է հարկավոր օրինագծերի քվեարկության տապալում, երբ 1-2 կասկածողների բանակը խարխլում է քո կուռ շարքերը:

Եվ որքան էլ գործուղումների քանակը Հանրապետականը պակասեցնի, ինկվիզիցիայի ենթարկելու սպառնալիքով բոլորին կարգադրի ներկայանալ խորհրդարան, հիվանդներին անգամ անկողնուց հանի ու բերի, ճգնաժամային իրավիճակներն այսուհետ կրկնվելու են: Եվ պատճառը բոլորովին էլ ընդդիմության կուռ պայքարը չէ, այլ սեփական թիմի գաղափարազուրկ լինելը: Թիմի անդամների հավատի բացակայությունը իրենց իշխանության եւ նրա ձեռնարկած քայլերի նկատմամբ: Նաեւ փողի, իշխանության նկատմամբ մեծ սերը, հայրենիքի հանդեպ սիրո իսպառ բացակայությունը:

Ստրկամտությունը, վախը, միեւնույն ժամանակ՝ տեւական ստորացված վիճակից կուտակված ներքին ընդզվումը: Կարծում եք նրանք չե՞ն հասկանում կուտակայինի օրենքի ամբողջ աբսուրդն ու վնասակարությունը: Չե՞ն հասկանում, որ երկիրը պառակտվել է երկու թշնամի ճամբարի՝ իշխանություն եւ ժողովուրդ: Եվ ինչքան անդունդը խորանում է, այնքան մեծ է հավանականությունը, որ իրենք «լավ չեն վերջացնելու»: Կասկածի ցոլքերն աչքերի մեջ, պատերի տակ բողոքելով, տարբեր քաղաքական խմբերի հետ տակից հարաբերություններ պահելով, բայց «վախճանի» զգացումը սրտում ապրելը մի բան չէ: Այդպես ինֆարկտն էլ հեռու չէ:

Շարունակությունը` «Հրապարակ»-ի այսօրվա համարում: