«Հրապարակ». Րաֆֆի Հովհաննիսյանը կրկին մտքափոխ է եղել

«Ժառանգություն» կուսակցության առաջնորդ Րաֆֆի Հովհաննիսյանը, չնայած ամիսներ առաջ ցանկություն էր հայտնել թողնելու կուսակցության ղեկը, կուսակցության համագումարին ընդառաջ կրկին մտքափոխ է եղել՝ «Նաջարյանը փոշմանել է»: Սա, իհարկե, տեղավորվում է նրա վերջին մեկ տարվա քաղաքական գործունեության տրամաբանության շրջանակներում: Եվ եթե իր կուսակիցներից մի մասի համար սա ուրախության պատճառ է, ապա կան նաեւ այնպիսիք, որ առանձնապես ոգեւորված չեն նրա այս մտադրությունից: Ինչեւէ, կուսակցությունը պատրաստվում է հունիսի 28-ի համագումարին: Գրում է «Հրապարակ»-ը:

Արդեն հայտնի է, որ կուսակցության ղեկավարի պաշտոնում մնալու է Րաֆֆի Հովհաննիսյանը: Վարչության կազմն ընդլայնվելու է' 11-ից դառնալով 15: Նախկին կազմից վարչությունը լքելու են Ստեփան Սաֆարյանը, Հովսեփ Խուրշուդյանը եւ Լուսինե Պետրոսյանը: Նոր վարչությունում կմնան Անահիտ Բախշյանը, Արմեն Մարտիրոսյանը, Զարուհի Փոստանջյանը, Ռուբիկ Հակոբյանը: Թե ինչու են ընդգծված արեւմտամետ հայացքներով ներկայացուցիչները լքում վարչությունը, կուսակցությունից պայմանավորում են մասնավոր պատճառներով: Իրականում սա կուսակցության քաղաքական հստակ գծի բացակայության ու չկողմնորոշվածության հետեւանք է: Մեկ Ռուսաստանի, մեկ Արեւմուտքի արանքում դեգերող կուսակցության առաջնորդը չի կարողանում Արեւմուտքին ներել նախագահական կեղծված ընտրություններին տրված գնահատականների համար: Թեեւ պաշտոնապես պնդում են մի գծի մասին' արեւմտյան արժեքներ եւ վերջ: «Ժառանգության» վարչության փոխնախագահ Արմեն Մարտիրոսյանը մեզ հետ զրույցում պնդեց, որ քաղաքական կուրսի փոփոխություն չի լինելու: «Վարչության կազմի փոփոխություն միշտ էլ եղել է, սա առաջին անգամ չէ, եղել է պահ, որ ես էլ չեմ եղել, այնպես որ, էստեղ որեւէ խնդիր ես չեմ տեսնում»: Ինչ վերաբերում է Հովսեփ Խուրշուդյանի եւ Ստեփան Սաֆարյանի դուրս գալուն, առաջինի դեպքում ասաց, որ նա ընդամենը մեկ անգամ է ընդգրկվել, այն էլ երկար համոզելուց հետո, եւ այս անգամ պարզապես չի ուզում, Սաֆարյանի մասով էլ հիշեցրեց նրա ավելի վաղ բերած հիմնավորումը, որ այլ գործով է զբաղվելու: Մեր հարցին, թե արդյո՞ք դրա բուն պատճառը քաղաքական լղոզված դիրքորոշումը չէ հատկապես արտաքին քաղաքականության մասով, արձագանքեց. «Ամբողջովին համաձայն չեմ, «Ժառանգությունում» գծի փոփոխություն երբեք չի եղել, դա ընդամենը փորձում եք լրագրողական մոտեցում բերել՝ ի վնաս կուսակցությանը: Ո՛չ, ծրագրային փոփոխություն չի լինի, հետեւաբար նաեւ' ներքին ու արտաքին քաղաքականության կուրսի: Արտաքին քաղաքականության առումով մենք հավասարակշռված մոտեցման կողմնակից ենք, արժեքային առումով' երկարաժամկետ կտրվածքով մեր քաղաքակրթական մոտեցումներով մենք Եվրոպական Միության կողմնակից ենք»: Իսկ նրանք, ովքեր կարծում են, որ Եվրամիության գծից իրենք շեղվել են, նպատակ ունեն սեփական եվրոպամետությունն ընդգծելու:

Շարունակությունը` «Հրապարակ»-ի այսօրվա համարում: