«Հրապարակ». Քաջարանում լարված իրավիճակ է

Քաջարանում լարված իրավիճակ է: Հունիսի 24-ին կայանալու է «Զանգեզուրի պղնձամոլիբդենային կոմբինատ» փակ բաժնետիրական ընկերության փայատերերի ժողովը, որի ժամանակ էական փոփոխություններ են կատարվելու կոմբինատի կառավարման համակարգում: Ինչպես արդեն հայտնի է՝ կոմբինատի երկարամյա տնօրեն, ըստ տեղացիների ինֆորմացիայի, մոտ 12 տոկոսի փայատեր Մաքսիմ Հակոբյանը կդադարի տնօրեն լինելուց, կդառնա փայատերերի խորհրդի նախագահ: Գրում է «Հրապարակ»-ը:

Տնօրենի պաշտոնը կոմբինատի մոտ 75 տոկոսի փայատեր գերմանական «Քրոնիմետ մայնինգ» ընկերության կողմից անցկացված մրցույթի արդյունքում շահել է ոմն ավստրալացի, ով, Քաջարանում շրջանառվող լուրերով, ստանալու է ամսական 9 միլիոն 600 հազար դրամ աշխատավարձ:

Նոր նշանակվելիք տեղակալներն ու նրա հետ եկող 20 հոգանոց թիմը, ըստ լուրերի, նույնպես ֆանտաստիկ աշխատավարձեր են ստանալու, մինչդեռ նախկիններն ստանում էին առավելագույնը 3-5 հազար դոլար: Նոր տնօրենը միջազգային մրցույթի արդյունքում է ընտրվել եւ գալիս է իր 20 հոգանոց թիմով: Այսինքն՝ Մաքսիմ Հակոբյանը հեռանում է իր թիմի հետ, որոնց խոստացել է անաշխատանք չթողնել: Բանն այն է, որ նա ձեռք է բերել Ախթալայի կոմբինատը, որը սնանկացման արդյունքում աճուրդի է հանվել: Վերջին ամիսներին պարոն Հակոբյանը հաճախ է մեկնում Ախթալա եւ այնտեղ մեծ ծրագրեր ունի: Սակայն խնդիրը միայն 20 հոգու՝ նախկին տեղակալներին կամ ղեկավար կազմին աշխատանքի տեղավորելը չէ: Եվ ոչ էլ սեփական բարեկեցությունը, քանի որ Մաքսիմ Հակոբյանը, բացի կոմբինատի բաժնետեր լինելուց, հսկայական հողատարածքներ ունի Սյունիքում, ֆերմաներ, մսի ու կաթի մշակման ձեռնարկություն եւ այլ ունեցվածք: Այնպես որ, եթե անգամ որդին մարզպետ չլինի, իր սերունդները կարող են հանգիստ վայելել դրանք՝ թոռից թոռ: Խնդիրն այն է, որ գերմանացի փայատերը դժգոհ է ուռճացված աշխատակազմից՝ այսօր կոմբինատում 3 հազար 200 մարդ է աշխատում, եւ խիստ տնտեսվարման դեպքում հանգիստ կարելի է մոտ 1000 հոգի կրճատել, ու դրանից աշխատանքը չի տուժի: Ավելին՝ կան մարդիկ, որոնք գրանցված են ու աշխատավարձ են ստանում, սակայն աշխատանքի չեն գնում: Եվ պատճառն այն է, որ տեղացի տնօրենը ոչ այնքան եկամտի, որքան իր հայրենակիցներին աշխատանքով ապահովելու մասին է մտածել: Բացի այդ, կոմբինատը մեծածավալ աշխատանքներ է իրականացնում մարզում՝ սկսած ասֆալտապատումից, նորոգումներից, տարբեր նախագծեր հովանավորելուց, վերջացրած հիվանդների բուժման եւ երեխաների կրթության ծախսերը հոգալով: Բնականաբար, ոչ գերմանացին, ոչ ավստրալացին նման խնդիրներ իրենց առջեւ չեն դնի: Թեեւ, ըստ լուրերի, նրանք շատ անհանգստացած են մարզի էկոլոգիական խնդիրներով եւ պատրաստվում են այս բնագավառում լուրջ ներդրումներ անել:

Ընդհանրապես՝ Մաքսիմ Հակոբյանի հեռանալը Քաջարանում տարբեր քննարկումների ու վարկածների տեղիք է տվել. մի մասն ասում է, որ գերմանացի փայատերը՝ Պիլարսկին, զայրացած է տնօրինության անտնտեսվարության եւ սխալ մենեջմենթի վրա, զարմացած է մեր իշխանությունների պահվածքից, սակայն չի ուզում նեղացնել իր գործընկերոջը՝ Հակոբյանին, ում հետ աշխատում են 2004 թվականից, ուստի նրան առաջարկել են խորհրդի նախագահի պատվավոր աթոռը: Մյուս վարկածով Հակոբյանն ինքն է հոգնել ու հիասթափվել՝ ոչ միայն նոր վարչապետն ու նրա հետ աշխատելը նրա սրտով չեն, այլեւ հոգնել է այս իշխանությունների «մուրացկանությունից», որոնք ուղղակի «կթում» են կոմբինատը: Ամեն դեպքում, Քաջարանը ոչ միայն տագնապած է, այլեւ կազմ-պատրաստ փողոց դուրս գալու, եթե նոր եկողները կրճատումներ անեն եւ իրենց զրկեն եկամտի միակ աղբյուրից, իսկ Քաջարանի կոմբինատը միակ աշխատավայրն է այս քաղաքի համար: Իրենց ներսում, քննարկումների ժամանակ նրանք անգամ սպառնում են հասնել Երեւան եւ նախագահականի մոտ բողոքի ակցիաներ անել: Ասում են՝ Մաքսիմ Հակոբյանը չի թողնում:

Շարունակությունը` «Հրապարակ»-ի այսօրվա համարում: