Ազգային ժողովը շարունակում է արտահերթ նստաշրջանի աշխատանքը (ուղիղ միացում)

Մեկնարկեց Ազգային ժողովի կառավարության նախաձեռնությամբ և հրատապ օրինագծերի քննարկման նպատակով հրավիրված արտահերթ նստաշրջանի չորրորդ օրվա աշխատանքը: Գրանցվեց 108 պատգամավոր, քվորում կա: Նիստն սկսվեց: Պատգամավորներն այսօր կշարունակեն հունիսի 20-ին սկսած' Հայաստանի Հանրապետության գազամատակարարման համակարգի գործունեությունն ուսումնասիրող ԱԺ ժամանակավոր հանձնաժողովի միջանկյալ եզրակացության քննարկումը:

Եզրակացությունը ներկայացրեց ժամանակավոր հանձնաժողովի նախագահ Վարդան Այվազյանը: Նա տեղեկացրեց, որ ժամանակավոր հանձնաժողովում ստեղծվել է չորս աշխատանքային ենթախումբ և ներգրավվել է երեք փորձագետ: Վարդան Այվազյանը ներկայացրեց հանձնաժողովի կատարած աշխատանքների ուղղվածությունը, ուսումնասիրություններն ու վերլուծությունները:

Օրենսդիրը հունիսի 20-ին ավարտել է «Կուտակային կենսաթոշակների մասին» և մի շարք այլ օրենքներում փոփոխություններ ու լրացումներ առաջարկող օրինագծերի փաթեթի քննարկումը: Արծվիկ Մինասյանը ՀՅԴ խմբակցության համար անընդունելի համարեց քննարկվող օրինագծերի փաթեթը, որի վերաբերյալ չեն եղել հանրային քննարկումներ:

Մհեր Շահգելդյանի գնահատմամբ՝ ՕԵԿ խմբակցության համար անընդունելի է քննարկվող օրինագծերի փաթեթը, քանի որ չի հանվել պարտադիր կուտակային բաղադրիչը:

ՀԱԿ խմբակցության ղեկավար Լևոն Զուրաբյանը նկատեց, որ պարտադիր կուտակային բաղադրիչը պարզապես դարձել է նպատակային սոցիալական վճար, ինչը, ըստ էության, ոչինչ չի փոխում:

ԲՀԿ անդամ Միքայել Մելքումյանի գնահատմամբ՝ այս փաթեթի ընդունման համար պատեհ պահ չի ընտրված. հանդուրժողական մթնոլորտում պետք է մասնագիտական վերլուծությունը համադրել քաղաքական որոշումների հետ և գտնել արդյունավետ լուծում: Նա տեղեկացրեց, որ ԲՀԿ-ն դեմ է այս տեսքով բարեփոխման իրականացմանը: «Ժառանգություն» խմբակցության ղեկավար Ռուբիկ Հակոբյանը դեմ արտահայտվեց օրինագծերի փաթեթին և նշեց, որ հարցի վերաբերյալ հանրային միասնական քննարկում չի եղել:

ՀՀԿ խմբակցության ղեկավար Վահրամ Բաղդասարյանը հիմնավորեց քննարկվող հարցի սահմանադրականությունը և ներկայացրեց պետական ու մասնավոր հատվածների աշխատողների նկատմամբ կիրառվող տարբեր մոտեցումների պատճառները: Նախատեսվում է, որ փաթեթը քվեարկության կդրվի այսօրվա նիստում:

ՀՀ վարչապետ Հովիկ Աբրահամյանի առաջարկով' մի շարք օրենքների նախագծեր հանվել են ԱԺ արտահերթ նստաշրջանի օրակարգից: