«Ֆրեսկո» փառատոնի շրջանակում կանցկացվի Հայոց ցեղասպանության 100-րդ տարելիցին նվիրված հատուկ ծրագիր

«Ֆրեսկո» արդի արվեստի և հոգևոր ֆիլմերի փառատոնը կմեկնարկի այսօր' հունիսի 21-ին: Փառատոնի շրջանակներում օրեր շարունակ կկազմակերպվեն տարատեսակ կինոդիտումներ, համերգներ, կինոճամբարներ մարզերում: Կազմակերպվելիք բոլոր միջոցառումների մուտքն ազատ է լինելու:

Փառատոնի կազմակերպիչ Շահեն Նազարենկոն հունիսի 21-ին, փառատոնի բացմանն ընդառաջ հրավիրված մամուլի ասուլիսին նշեց, որ հոգևոր ֆիլմերի փառատոնն ավելի շուտ քննարկման կինոփառատոն է, որտեղ յուրաքանչյուրը կարող է գալ, նստել և խոսել երևույթի շուրջ: «Ամբողջ աշխարհում նման փառատոններ կան, Հայաստանում առաջին անգամ է կազմակերպվում: Ունենք մրցութային և արտամրցութային ֆիլմեր»,- նշեց Նազարենկոն:

««Ֆրեսկոն» համախմբման, երկխոսության, աշխարհի մշակույթի, լավ ֆիլմերի, լավ ռեժիսորների հետ ծանոթանալու առիթ է, նաև' համագործակցության տեսակ: Մենք չենք գնահատելու ռեժիսորի, օպերատորի, դերասանի աշխատանքը, մենք մրցանակներ ենք շնորհելու լավագույնս սեր պատգամող, լավագույն երկխոսություն, հանդուրժողականություն ձևավորող ֆիլմերին: Գլխավոր մրցանակը կրում է «Վնասվածը վերականգնելու կարիք կա» խորագիրը»,- նշեց Սուրբ Երրորդություն եկեղեցու հոգևոր հովիվ տեր Եսայի քահանա Արթենյանը:

Կազմակերպիչները նշեցին, որ փառատոնին ներկայացվել է 300-ից ավելի ֆիլմ, որոնցից ընտրվել է 57-ը: Այդ ֆիլմերից 21-ն ընդգրկված է մրցութային ծրագրում: Հայաստանից մրցութային ծրագրում ընդգրկված է միայն մեկ կինոնկար' Արա Երնջակյանի «Խավարումը»:

Փառատոնի ժյուրիի անդամ, իտալացի ռեժիսոր Ջանլուկա Սոդարոն ուրախ է Հայաստանում գտնվելու համար: «Ուրախ եմ, որ իմ ֆիլմն էլ է ներկայացվելու: Ինձ գրավեց հատկապես փառատոնի ինքնատիպությունը: Ֆիլմս կարճամետրաժ է, մարդկային հոգեբանության մասին է»,- նշեց Սոդարոն:

Փառատոնային օրերին աշխարհի 17 երկրներից Հայաստան բերված շուրջ 6 տասնյակ ֆիլմերը հանդիսատեսին կներկայացվեն հիմնականում երեկոյան' Կարապի լճի տարածքում տեղադրված կինոէկրանին: Դիտումներից հետո կկազմակերպվեն քննարկումներ ֆիլմերը ներկայացնող հյուրերի հետ: Ֆիլմեր կցուցադրվեն նաև Հայաստանի երգչախմբային ընկերության, Մայր Աթոռի Գևորգևյան ճեմարանի հանդիսությունների և Արարատյան հայրապետական թեմի առաջնորդարանի դահլիճներում:

Փառատոնի շրջանակում ընդգրկված է «Ճշմարտության հուշարձան» խորագրով հատուկ ծրագիր' նվիրված Հայոց ցեղասպանության 100-րդ տարելիցին: Կինոդիտումներ կանցկացվեն նաև Հայոց ցեղասպանության թանգարան-ինստիտուտում: Ծրագրի շրջանակում կանցկացվի հանդիպում Հայր Հովհաննեսի (Ջիովաննի Գուայտա) հետ: Փառատոնը կտևի մինչև հունիսի 6-ը, իսկ մրցանակաբաշխությունը կանցկացվի հունիսի 29-ին: