Երուսաղեմի հայոց պատրիարքն այցելել է Մայր Աթոռ սուրբ Էջմիածին

Մայր Աթոռ Սուրբ Էջմիածին է ժամանել Երուսաղեմի Հայոց Պատրիարք Ամենապատիվ Տ. Նուրհան արքեպիսկոպոս Մանուկյանը' պատրիարքական ընտրությունից հետո Իջման Ս. Սեղանի առջև իր ուխտը վերանորոգելու համար: Նուրհան Պատրիարքին ուղեկցում են Երուսաղեմի Ժառանգավորաց վարժարանի և ընծայարանի տեսուչ Տ. Թեոդորոս վարդապետ Զաքարյանը և Տ. Տիրան աբեղա Հակոբյանը:

Հայոց Պատրիարքը հանդիսավոր թափորով «Հրաշափառ» երգեցողության ներքո առաջնորդվեց դեպի Մայր Տաճար, ուր Իջման Սուրբ Սեղանի առջև կատարվեց աղոթքի արարողություն: Ապա Ամենապատիվ Պատրիարքին միաբանության անունից ողջունեց Մայր Աթոռի Լուսարարապետ Տ. Հովնան եպիսկոպոս Հակոբյանը:

«Անշուշտ, հաճախակի չայցելել դեռևս չի նշանակում, որ Մայր Աթոռ Ս. Էջմիածինը մեր մտքից ու սրտից դուրս է, ընդհակառակը, յուրաքանչյուր հայի համար Մայր Աթոռը Սրբություն Սրբոց է և պետք է այդպես մնա և պիտի մնա մանավանդ Երուսաղեմի հայերի համար»,- Մայր Աթոռի միաբաններին ուղղված խոսքում նշել է Նուրհան Պատրիարքը:

Բարիգալստյան արարողությունից հետո տեղի է ունեցել Ամենայն Հայոց Գարեգին Բ Կաթողիկոսի և Երուսաղեմի Հայոց Պատրիարք Տ. Նուրհան արքեպիսկոպոս Մանուկյանի հանդիպումը:

Ողջունելով Ամենապատիվ Պատրիարքի այցը Մայր Աթոռ Սուրբ Էջմիածին' Ամենայն Հայոց Կաթողիկոսը գոհունակությամբ փաստել է, որ այս օրերին Սփյուռքի և Հայաստանի տարբեր համայնքներից Սուրբ Էջմիածնում ժողովի են համախմբվել Մայր Աթոռի միաբանները և հունիսի 22-ին նաև իրենց մասնակցությունը պիտի բերեն Սուրբ Էջմիածնի տոնին:

Զրույցի ընթացքում մասնավոր անդրադարձ է կատարվել Երուսաղեմի Հայոց Պատրիարքության գործունեությանը, միաբանության կյանքին, ինչպես նաև հայ ժողովրդի հոգևոր ընթացքին:

Առաջիկա օրերին Ամենայն Հայոց Հովվապետը և Երուսաղեմի Պատրիարքն անդրադարձ կունենան Հայ Եկեղեցու առջև ծառացած մարտահրավերներին ու ազգային-եկեղեցական կյանքը հուզող տարբեր խնդիրներին: