ՀՅԴ-ն ոչ իշխանական մյուս ուժերի հետ առաջիկայում կքննարկի «կուտակայինի» առնչությամբ ՍԴ դիմելու հարցը

Ազգային ժողովի ՀՅԴ խմբակցությունը մտադրություն ունի «Կուտակային կենսաթոշակների մասին» ՀՀ օրենքում փոփոխությունների օրենսդրական փաթեթի ընդունման առնչությամբ դիմել Սահմանադրական դատարան: «Ես ձեզ ցանկանում եմ տեղեկացնել, որ գոնե մեր խմբակցությունում մտադրություն կա և առաջիկայում շատ արագ կկողմնորոշվենք ու կներկայացնենք քառյակին, որ մենք արդեն կարող ենք դիմել Սահմանդարական դատարան և' այսօր ընդունվելիք օրենքի սահմանդրականությունը վիճարկելու առումով, և' նաև օրենքը բերելու, ԱԺ կանոնակարգը խախտելու հիմքերով: Սա մեր առաջիկա քայլերն են, և մենք կքննարկենք դրանք ու կներկայացնենք քառյակին»,- քառյակի ասուլիսի ժամանակ հայտնեց ՀՅԴ խմբակցության քարտուղար Աղվան Վարդանյանը:

Աղվան Վարդանյանը նշեց, որ քառյակով հավաքվել են, խորհրդակցել ու ընդունել համատեղ հայտարարություն կուտակայինի քվեարկության առնչությամբ:

ԲՀԿ խմբակցության ղեկավար Նաիրա Զոհրաբյանը ներկայացրեց համատեղ հայտարությունը, ըստ որի, քառյակը հայտարարում է. «Կուտակային կենսաթոշակներին վերաբերող օրենսդրական փաթեթի քննարկումն ու քվեարկությունն անվավեր է: Մենք դատապարտում ենք քաղաքական մեծամասնության նման գործելաոճը և հայտնում, որ հասարակության հետ շարունակելու ենք պայքարել Սահմանադրական դատարանի որոշման կիրառման համար»,- հայտարարության տեքստն ընթերցեց Նաիրա Զոհրաբյանը:

ՀԱԿ խմբակցության պատգամավոր Լևոն Զուրաբյանի կարծիքով' «կուտակայինի» վերաբերյալ նշյալ նախագիծը հանրային հնչեղություն ունեցող օրենք է, որի շուրջ պետք է իրականացվեին հանրային քննարկումներ: «Իշխանությունները խոստացել էին, որ լայն հանրային քննարկում կլինի, բայց նրանք հասկացան, որ լայն հանրային քննարկման արդյունքում միակ բանը, որ պետք է պարզվեր, այն էր, որ ժողովրդի մեծամասնությունը դեմ է այս օրենքին»,- ասաց նա:

«Ժառանգություն» խմբակցության ղեկավար Ռուբիկ Հակոբյանն էլ հայտնեց, որ ՕԵԿ խմբակցությունը ևս ծանոթ է համատեղ հայտարարությանը, քննարկել են այն ու համամիտ են նշված մոտեցման հետ:

«Կուտակային կենսաթոշակների մասին» ՀՀ օրենքում փոփոխություն կատարելու մասին և կից ներկայացված օրենքների նախագծերի փաթեթն առաջին ընթերցմամբ ընդունելու հարցը դրվեց քվեարկության և ընդունվեց 67 կողմ ձայնով' չգրանցելով դեմ կամ ձեռնպահ: