Մեկ երեկո բուժաշխատողներին հիվանդի մահճակալի փոխարեն Օպերայի դահլիճ էին հրավիրել

Բուժաշխատողի օրվան նվիրված` հունիսի 21-ին Ալեքսանդր Սպենդարյանի անվան օպերային և բալետի ազգային ակադեմիական թատրոնում Հայաստանի Հանրապետության առողջապահության նախարարությունը կազմակերպել էր մեծարման երեկո: Միջոցառմանը շնորհավորանքի խոսք ասաց ՀՀ առողջապահության նախարար Արմեն Մուրադյանը:«Ես շատ ուրախ եմ, որ լինելով բուժաշխատողներից մեկը` հնարավորություն ունեմ համակարգելու և շնորհավորանքի խոսքեր հղելու մեր բուժաշխատողներին` մաղթելով նրանց քաջառողջություն, պաշտպանվածության զգացում և խաղաղ երկինք, որպեսզի կարողանան իրենց վայել աշխատանքով իրենց ուրույն տեղը գտնել, ձեռք մեկնել կարիքավորներին` մեր բնակչությանը պարգևելով առողջություն: Առանձնահատուկ կցանկանայի նշել մեր այն բժիշկերին, ովքեր այս տոնական օրը դահլիճում լինելու փոխարեն հիվանդանոցներում, շտապօգնության մեքենաներում, հիվանդի մահճակալի կողքին են»,- լրագրողների հետ զրույցում ասաց նախարարը:

Տոնի կապակցությամբ` շնորհավորական ուղերձ էր հղել նաև ՀՀ նախագահ Սերժ Սարգսյանը: Միջոցառմանը ներկա էին ՀՀ առաջին տիկին Ռիտա Սարգսյանը, անվանի բժիշկներ, առողջապահական տարբեր ոլորտների մասնագետներ, կառավարության և պետական մարմինների բարձր պաշտոնյաներ: «Բժշկությունը երևի դժվարագույն մասնագիտություններից մեկն է: Մեզ համար ծանրագույն տարիներին, երբ չունեինք լույս և ջեռուցում, մեր բժիշկներն աշխատում էին, և ոչ մի անգամ ոչ մի հիվանդանոց չդադարեցրեց գործունեությունը: Այսօր էլ նրանք պատվով շարունակում են կատարել իրենց պարտքը»,- ասաց Ուռուցքաբանության ազգային կենտրոնի փոխտնօրեն Գագիկ Բազիկյանը` շնորհավորելով առողջապահության ոլորտի բոլոր աշխատողների տոնը: Անդրադառնալով ոլորտում առկա խնդիրներին` ուռուցքաբանը նշեց, որ հիմնական խնդիրը ֆինանսավորումն է. լինելով ամենածախստար ոլորտներից մեկը` բժշկությանը հատկացվող գումարները չեն բավարարում:

Միջոցառման ընթացքում ցուցադրվեցին առողջապահական ամենատարբեր ոլորտների մասին պատմող տեսաֆիլմեր, ուր ռեժիսորական հետաքրքիր լուծումների միջոցով ներկայացված էին մեր երկրում բժշկագիտության սկզբնավորման և զարգացման պատմությունը, Երևանի և մարզերի ժամանակակից, միջազգային չափանիծներին համապատասխանող բժշկական կենտրոնները: Տոնական համերգային ծրագրի ընթացքում ելույթ ունեցան հայկական երգարվեստի տարբեր սերունդների ներկայացուցիչներ:

ՀՀ կառավարության որոշմամբ` 2001 թվականից հունիսի երրորդ կիրակին տոնվում է «Բուժաշխատողի օրը» որպես մասնագիտական հաջողություններն ու ձեռքբերումներն արձանագրելու, բուժաշխատողներին երախտիքի խոսք ասելու գեղեցիկ հնարավորություն: 2012 թվականից Հայաստանում «Բուժաշխատողի օրը» նշվում է հունիսի 21-ին:

Տոնին ընդառաջ` նախարար Արմեն Մուրադյանի նախաձեռնությամբ ՀՀ ԱՆ-ն սկսել է «Կոչումով բժիշկ» նախագիծը: Այն միտված է բարձրացնելու, վերարժևորելու բժիշկի կարևոր դերն ու հեղինակությունը հասարակության մեջ: Նախագծի միջոցով ընթերցողի դատին են ներկայացվում Հայաստանում և նրա սահմաններից դուրս բնակվող հայ բժիշկների` մարդկանց ապաքինելուն, կյանքեր փրկելուն ուղղված ամենօրյա բարդ աշխատանքը: