Ադրբեջանում սկսվել է ադրբեջանա-ռուսաստանյան միջտարածաշրջանային 5-րդ ֆորումը

Ադրբեջանի Գաբալա (Կուտկաշեն) քաղաքում այսօր իր աշխտանքներն է սկսել ադրբեջանա-ռուսաստանյան միջտարածաշրջանային 5-րդ ֆորումը:

Կոնֆերանսի մասնակիցներին ընթերցվել են ՌԴ նախագահ Վլադիմիր Պուտինի և Ադրբեջանի նախագահ Իլհամ Ալիևի շնորհավորական նամակները: Այնուհետև ելույթ են ունեցել Ադրբեջանի տնտեսական զարգացման նախարար Շահին Մուստաֆաևը, ՌԴ տարածաշրջանային զարգացման նախարար Իգոր Սլյունյաևը, ՌԴ-ում Ադրբեջանի դեսպան Փոլադ Բյուլ-բյուլօղլուն, Ադրբեջանում ՌԴ դեսպան Վլադիմիր Դորոխինը, ինչպես նաև Ռուսաստանի տարածաշրջանների ղեկավարներ' Դաղստանի ղեկավար Ռամազան Աբդուլաթիպովը, Ստավրոպոլի նահանգապետի պաշտոնակատար Վյաչեսլավ Վլադիմիրովը, Ինգուշեթիայի ղեկավար Յունուսբեկ Եվկուրովը:

Ֆորումում Դաղստանի ղեկավար Աբդուլաթիպովը հայտարարել է, որ Ադրբեջանի և Ռուսաստանի միջև հարաբերությունները տնտեսական, մշակութային և այլ ոլորտներում զարգանում են: «Գաբալայում բացված ադրբեջանա-ռուսաստանյան ֆորումը նոր ազդակ կհաղորդի այդ հարաբերությունների զարգացմանը», -ասել է նա:

Ինգուշեթիայի ղեկավար Եվկուրովը հայտարարել է. «Ադրբեջանի զարգացումը ուրախացնում է բոլորին Հյուսիսային Կովկասում, և մենք փորձում ենք ուսումնասիրել զարգացման նրա փորձը»:

Փոլադ Բյուլ-բյուլօղլուն էլ հայտարարել է, որ Ադրբեջանին և Ռուսաստանին կապում են «ռազմավարական բարեկամական հարաբերությունները», որոնք տարեց տարի «ավելի լայն թափ են ստանում»:

Ադրբեջանում ՌԴ դեսպան Դորոխինն էլ ասել է, որ ադրբեջանա-ռուսաստանյան հարաբերությունների հիմքը «փոխըմբռնումն է»: