Թուրք նախարարը նախագահական ընտրություններից առաջ` երկրի ապակայունացման մասին

Որոշ ուժեր ցանկանում են Թուրքիայում նախագահական ընտրություններից առաջ ապակայունացնել իրադրությունը երկրում, որը կարող է լուրջ տնտեսական խնդիրներ առաջացնել: Այս մասին հայտարարել է Թուրքիայի ֆինանսների նախարար Մեհմեթ Շիմշեքը:

Նրա խոսքով` Թուրքիայում իրադրության ապակայունացումը կարող է նրա տնտեսությունը հետ շպրտել 20 տարով, ինչը շահավետ է որոշ ուժերի: Թե հատկապես ինչ ուժերի մասին է խոսքը, նախարարը չի ճշտել: Շիմշեքը նաև նշել է, որ 2014 թվականը Թուրքիայի էկոնոմիկայի համար «դժվար ժամանակաշրջան է» հանդիսանում:

Թուրքիայում նախագահական ընտրությունները նշանակված են 2014 թվականի օգոստոսի 10-ին: Եթե թեկնածուներից ոչ մեկը ընտրություններում ձայների 51 տոկոսը չհավաքի առաջին փուլում, ապա օգոստոսի 24-ին կկայանա երկրորդ փուլը:

2007 թվականին տեղի ունեցած հանրաքվեի արդյունքների համաձայն, ի տարբերություն նախկին նախագահական ընտրությունների, 2014 թվականից Թուրքիայի նախագահը պետք է ընտրվի ոչ թե խորհրդարանի, այլ ժողովրդի կողմից, ընդ որում 5 տարի ժամկետով' 7 տարվա փոխարեն, ինչպես նախկինում էր:

Թուրքիայի փոխվարչապետ Բյուլենթ Արինչը երկու շաբաթ առաջ հայտարարել էր, որ երկրի վարչապետ Ռեջեփ Թայիփ Էրդողանը, որը մարտին տեղի ունեցած տեղական ինքնակառավարման մարմինների ընտրություններում ստացել է ժողովրդի աջակցությունը, կարող է ընտրվել է Թուրքիայի նախագահ, եթե նրա թեկնածությունն առաջադրի իշխող «Արդարություն և զարգացում» կուսակցությունը:

Հունիսի 16-ին Թուրքիայի գլխավոր ընդդիմադիր Ժողովրդահանրապետական կուսակցության (ԺՀԿ) և «Ազգայնական շարժում» կուսակցության (ԱՇԿ) առաջնորդներ Քեմալ Քըլըչդարօղլուն և Դևլեթ Բահչելին առաջիկա ընտրություններում Թուրքիայի նախագահի պաշտոնում ընտրվելու համար անկուսակցական Աքմալադդին Իհսանօղլուին առաջադրել են ընդդիմության միասնական թեկնածու: Քեմալադդին Իհսանօղլուն, ով երկար ժամանակ զբաղեցնում էր Իսլամական կոնֆերանս կազմակերպության ղեկավարի պաշտոնը, Թուրքիայի նախագահի համար պայքարում դառնալու է երկրի վարչապետ Ռեջեփ Թայիփ Էրդողանի գլխավոր մրցակիցը: Քեմալադդին Իհսանօղլուին մտադիր են պաշտպանել ևս երկու ընդդիմադիր կուակցություններ' Մեծ միասնություն (ՄՄԿ) և Ժողովրդավարների (ԴԿ) կուսակցությունները: