ԱՀԿ-ն Հայաստանում Երեխաների և դեռահասների առողջության պահպանման առաջընթացի զեկույց է հրապարակել

Հայաստանը կարիք ունի ավելի մեծ ուշադրություն դարձնել ամբուլատոր և ստացիոնար մակարդակներում առողջապահության որակի արդյունավետ կառավարման խոչընդոտներին: Այս մասին նշվում է Առողջության համաշխարհային կազմակերպության (ԱՀԿ)' 2014 թվականի ապրիլի 28-30-ը Հայաստան կատարած այցի մասին հաղորդագրությունում: Այցի նպատակն էր վերահսկել և օժանդակել Հայաստանում Երեխաների և դեռահասների առողջության պահպանման վերաբերյալ ազգային ռազմավարության ներդրման գործընթացին: Կազմակերպության ներկայացուցիչներն այցելել են ՀՀ առողջապահության նախարարություն, ինչպես նաև հանրապետության հիմնական բուժհաստատություններ և հիվանդանոցներ:

Ինչպես նշվում է կազմակերպության տարածած հաղորդագրությունում, ՀՀ առողջապահության նախարարությունը կարևոր ջանքեր է գործադրել մոր և մանկան առողջապահության բարելավման ուղղությամբ: Հայաստանը որդեգրել է Երեխաների և դեռահասների առողջության պահպանման ազգային ռազմավարություն' 2010-2015-ի համար մշակված գործողությունների պլանով, և Երեխաների իրավունքների պաշտպանության ռազմավարական պլանը' 2013-2015-ի համար: Կառավարությունը նաև հաստատել է Երեխաների հիվանդանոցային խնամքի որակի բարելավման ռազմավարությունը' 2013-2016-ն ընկած ժամանակահատվածի համար: Իսկ 2011 թվականի հունվարին հանրությանն է ներկայացվել Երեխայի առողջության պետական հավաստագիրը (ԵԱՊՀ), որը 0-7 տարեկան երեխաների համար երաշխավորում է անվճար բուժօգնություն հիվանդանոցներում:

«Այնուամենայնիվ, առաջնային մակարդակի մանկաբուժական խնամքի համար հատկացվող ֆինանսական օգնությունն անփոփոխ է մնացել 2008 թվականից ի վեր և մատուցվող ծառայությունների որակին վերաբերող հարցերը շարունակում են առանցքային մնալ առողջապահության ազգային օրակարգում»,- նշվում է ԱՀԿ հաղորդագրությունում:

Այցի ընթացքում ԱՀԿ պատվիրակությունը դիտարկում է անցկացրել Երեխաների հիվանդանոցային խնամքի որակի բարելավման ռազմավարության իրականացման և Մանկական հիվանդությունների ինտեգրացված վարմանը (ՄՀԻՎ) վերաբերող խնդիրների վերաբերյալ: Կազմակերպությունը հայաստանյան մի շարք հիվանդանոցներում ներկայացրել է երեխաների իրավունքների պաշտպանության ԱՀԿ գործիքները, նոր չափանիշներ և իրավասություններ սահմանել դպրոցների բուժաշխատողների համար: Դյուրացվել է ինտեգրված գործողությունների պլանի մշակումը' թոքաբորբի և դիարեայի կանխարգելման և վերահսկողության համար: