ՀԱԿ-ը «չի ճանաչում» Ռոբերտ Քոչարյան քաղաքական գործչին

Հայաստանի երկրորդ նախագահ Ռոբերտ Քոչարյանը` որպես քաղաքական գործիչ, ընդունելի չէ Հայ ազգային կոնգրեսի համար: Այս մասին լրագրողների հետ հանդիպման ժամանակ հայտարարեց ԱԺ պատգամավոր, ՀԱԿ խմբակցության քարտուղար Արամ Մանուկյանը' նշելով, որ թեև ասուլիսի է եկել հայտնելու իր տեսակետը, սակայն խմբակցությունում ևս իշխող է նման դիրքորոշումը: «Ես ցանկություն չունեմ կարդալու նրա հարցազրույցը: Շատ վաղուց ինձ համար նման քաղաքական գործիչ գոյություն չունի, և ես չեմ ընդունում նման քաղաքական գործչի»,- հայտարարեց Մանուկյանը: Նա հրաժարվեց Քոչարյանի հարցազրույցին վերաբերող մյուս հարցերին պատասխանելուց' շեշտելով, որ ասուլիս գալուց առաջ փորձել է զսպել իրեն և լինել չափավոր:

Արամ Մանուկյանը, սակայն չհրաժարվեց մեկնաբանել Ռոբերտ Քոչարյանի հարցազրույցում առանձնակի ընդգծված' «Որոտանի կասկադի» վաճառքին վերաբերող հարցերը: Մանուկյանը նշեց, որ իր համար էներգակիրները' իրենց զուտ նշանակությունից զատ, ունեն նաև պետականության պահպանման և սուվերենության նշանակություն: «Դրանք, ռազմավարական արժեքներ, պետություն պահող արժեքներ և տնտեսական լուրջ լծակներ են: Եթե մենք պայքարում ենք դրանց համար, ունենք մի հեռահար մղում` դա հայրենիքի ուժեղ լինելն է: Փառք աստծո, որ կան քաղաքական և քաղաքացիական ուժեր, որոնք կռիվ են տալիս դրա համար»,- ասաց Մանուկյանը: