Ալիևին ԵԽԽՎ-ում «նեղն են գցել»

Եվրախորհրդի Խորհրդարանական վեհաժողովում Ադրբեջանի նախագահ Իլհամ Ալիևին ուղղված' այդ երկրում քաղբանտարկյալների մասին հարցը ողջունվեց եվրապատվիրակների ծափերով: Հարցի հեղինակն իռլանդացի պատգամավոր Մայքլ ՄքՆամարան է, ով ԵԽԽՎ-ում հունիսի 23-ին կայացած քվեարկությամբ լիազորվել է զեկույց պատրաստել Ադրբեջանում քաղբանտարկյալների հետ կապված իրավիճակի վերաբերյալ: Ալիևն իռլանդացի պատգամավորին մեղադրեց բամբասանք և կեղծ տեղեկություններ տարածելու մեջ: Նա, հանդուգն պահվածք դրսևորելով, ստախոսներ անվանեց այն պատվիրակներին, ովքեր հարց էին բարձրացնում իրենց մասնագիտական գործունեության համար բանտարկված լրագրողների մասին: «Չի կարելի թույլ տալ, որ Ադրբեջանը բացասական օրինակ լինի Եվրախորհրդի երկրների համար»,- եվրապատվիրակի դիտարկմանն ի պատասխան Ալիևը վիրավորեց նրան` ասելով, թե կեղծ լուրեր տարածող պատգամավորը գուցե խոսում է իր երկրի մասին:

Եվրոպացի պատգամավորներն Ադրբեջանում գենդերային հավասարության ցուցանիշն անվանեցին սարսափելի: Ալիևի պատասխաններից, սակայն, տպավորությունն այնպիսին էր, թե եվրոպական երկրներում վիճակն ավելի սարսափելի է, քան Ադրբեջանում, քանի որ նա անընդհատ հակադարձում էր պատվիրակներին' «միգուցե այդպես է ձեր երկրներում»: «Մարդու իրավունքների և հիմնարար ազատությունների հետ կապված մեր երկրում վիճակը չի տարբերվում ձեր երկրների իրավիճակից»,- ասաց Ալիևը:

Իլհամ Ալիևի ելույթն ընդմիջվեց տհաճ միջադեպով. ներս խուժեցին սև ժապավենով փակած բերաններով ու կրծքներին քաղբանտարկյալների նկարներ փակցված մի խումբ երիտասարդներ, ովքեր ելույթի ողջ ընթացքում մնացին դահլիճում և հավանության նշաններ էին անում, երբ հարցերը վերաբերում էին քաղբանտարկյալներին, բանտարկված լրագրողներին, նաև` Լեյլա Յունուսին:

Եվրապատվիրակներից քչերն էին Ալիևի հասցեին հիացական արտահայտություններ անում, շատերի հարցերը վերաբերում էին այդ երկրում մարդու իրավունքների ու հիմնարար ազատությունների խախտումներին: