Հերմինե Նաղդալյանը Ալիևի պահվածքը համարում է ԵԽ նախագահող երկրին ոչ հարիր

ԵԽԽՎ հայկական պատվիրակության ղեկավար, ՀՀ Ազգային Ժողովի փոխնախագահ Հերմինե Նաղդալյանն Ադրբեջանի Նախագահ Իլհամ Ալիևի ելույթն ու պահվածքը համարում է աննախադեպ, որը բացարձակ պատիվ չի բերում նախագահող երկրին:

Այս մասին նշեց ՀՀ ԱԺ փոխխոսնակն՝ «Արմենպրես»-ի հետ զրույցում: Հերմինե Նաղդալյանի խոսքով՝ Եվրոպայի խորհրդի պատգամավորները հարցեր են բարձրացրել և տհաճ պահեր ստեղծել Ադրբեջանի նախագահի համար, իսկ նրա միակ պատասխան-փաստարկը՝ պարզ ժխտողականությունն էր: «Ալիևը նշում էր, որ իրենք չունեն քաղբանտարկյալներ, լրագրողներ, ովքեր բանտում են, և իրավապաշտպան կինը՝ Լեյլա Յունուսն է հարձակվել ոստիկանի վրա: Ինչ վեաբերում է միջազգային նորմերին համապատասխան Եվրոպայի խորհրդի նախագահի տեղակալին երկիր մուտքն արգելելուն, հակառակը՝ նա խորհուրդ էր տալիս պահպանել միջազգային օրենքները: Մի խոսքով՝ աննախադեպ պահվածք Ադրբեջանի Նախագահի կողմից, որը բացարձակ պատիվ չէր բերում նախագահող երկրին, որովհետև պատասխանների մեծ մասը չէին համապատասխանում իրականությանը, և այդ տոնը, որով խոսում էր պատգամավորի հետ, մատ էր թափ տալիս, խոսում է այն մասին, որ հավասարակշռությունը կորցնում են մեր ադրբեջանցի գործընկերները»,- ասաց Հերմինե Նաղդալյանը՝ հավելելով, որ միայն նշել, թե պահպանում են քաղաքական ազատությունները, իսկ միջազգային հանրությունը պարզապես ստում է. այդ ոճը և ձևը ընդունված չէ և հաջողություն չի կարող բերել:

ՀՀ ԱԺ փոխխոսնակը նշեց, որ Ալիևի ելույթն՝ ուղղված Ղարաբաղի թեմային, ևս լի էր ապատեղեկատվությամբ ու ստով: «Իհարկե, Ալիևն իր ելույթի զգալի մասը նվիրել էր Ղարաբաղի թեմային, որը նույնպես համեմված էր ստով. օրինակ, որ Ադրբեջանը կոնստրուկտիվ դեր է կատարում հակամարտության կարգավորման գործում, բայց ամբողջ միջազգային հանրությունը և հատկապես դրանով զբաղվողները շատ լավ գիտեն, որ Կազանի գործընթացը ձախողվել է անմիջապես Ադրբեջանի կողմից: Նա բոլորովին չկարողացավ ցույց տալ իր լայնախոհությունն ու պատրաստակամությունը կոնֆլիկտի կարգավորման հարցում»,- հայտնեց Հերմինե Նաղդալյանն՝ ավելացնելով, որ Ալիևի այն դիտարկմանը, թե ԵԽ պատգամավորների հարցերը հիմնված են բամբասանքների վրա, լավ չի ընդունվել պատվիրակների կողմից:

«Մի քանի անգամ ադրբեջանցի պատվիրակները փորձեցին ծափահարություններով աջակցություն ապահովել, բայց և այնպես այդ փորձն՝ ամեն ինչում մեղադրել հայերին ու շեղել ուշադրությունը կոնֆլիկտի վրա, մատ թափ տալով խոսել ԵԽ անդամների հետ, լավագույն ձևը չէր, որը կարող էր ընտրել յուրաքանչյուր երկրի ղեկավարը»,- նշեց Հերմինե Նաղդալյանը:

ԱԺ փոխխոսնակի հավաստմամբ՝ ԵԽԽՎ-ում հայկական պատվիրակությունը բավականին ծանրաբեռնված աշխատանք է կատարում՝ հանձնաժողովներում և քաղաքական խմբերում փորձում բացատրական աշխատանքներ տանել:

Երկուշաբթի օրը՝ հունիսի 23-ին, Ստրասբուրգում մեկնարկել է ԵԽԽՎ ամառային նստաշրջանը: ՀՀ Աժ փոխնախագահ Հերմինե Նաղդալյանի գլխավորությամբ՝ ԵԽԽՎ-ում հայկական պատվիրակությունը մասնակցում է նստաշրջանին:

ԵԽԽՎ-ում ԵԽ նախարարների կոմիտեում նախագահությունն անցել է Ադրբեջանին, և այդ առթիվ Ստրասբուրգում Ադրբեջանի Նախագահը ելույթ է ունեցել: Ադրբեջանը ԵԽԽՎ-ում հայկական պատվիրակությանը ձայնից զրկելու բանաձևի նախագիծ է ներկայացրել, որի տակ ստորագրել է 58 պատգամավոր, առաջամարտիկ են թուրքերը: