Գառնիի երկրաֆիզիկական դիտարանը կվերագործարկվի

Հայաստանի արտակարգ իրավիճակների նախարարությանը հանձնված Գառնիի երկաֆիզիկական դիտարանի վերագործարկման նպատակով ՀՀ կառավարությունն այն կառուցապատող ընկերությանը կհանձնի ՀՀ պետական սեփականություն հանդիսացող Երևանի Աճառյան 54ա հասցեում գտնվող շենքը և դրա սպասարկման համար անհրաժեշտ հողամասը, որը գնահատվում է 399 մլն 240 հազար դրամ: Համապատասխան որոշման նախագիծն ընդգրկված է գործադիրի հունիսի 26-ի նիստի օրակարգում:

Հիմնավորման համաձայն՝ Գառնիի երկրաֆիզիկական դիտարանի վերագործարկումը հնարավորություն կտա նոր և ավելի հուսալի դիտարկումների հիման վրա գնահատել ՀՀ տարածքի, ինչպես նաև Թուրքիայի, Իրանի, Վրաստանի, Ադրբեջանի երկրակեղևի լարվածա-դեֆորմացիոն իրավիճակը, երկրաշարժերի առաջացման մեխանիզմները, գրանցել միջուկային գաղտնի պայթեցումները, տարանջատել երկրաշարժերի նախանշանները, գնահատել ընթացիկ սեյսմիկ վտանգը և որպես հեռավոր կարևորագույն գիտական և սո ցիալական խնդիր' կանխատեսել սպասվող ուժեղ երկրաշարժերը:

Միաժամանակ դիտարանում կտեղակայվի հայ-ռուսական հումանիտար կենտրոնը: «Արմենպրես»-ի հաղորդմամբ՝ նախատեսվում է կենտրոնում ստեղծել հումանիտար օգնության ցուցաբերման համար նյութական պաշարների բազա, որոնողափրկարարական աշխատանքների նյութատեխնիկական և տուժած բնակչությանը առաջին անհարժեշտության ապրանքներով ապահովման համար անհրաժեշտ պաշարների կուտակում: Կիրականացվեն նաև որոնողափրկարարական աշխատանքներ, կանցկացվեն համատեղ ուսումնավարժություններ, ու սումնական գործընթաց և այլն:

ՀՀ կառավարության 2012 թվականի որոշմամբ Գառնիի երկրաֆիզիկական դիտարանը հանձնվել է ՀՀ արտակարգ իրավիճակների նախարարության «Սեյսմիկ պաշտպանության արևմտյան ծառայություն» պետական ոչ առևտրային կազմակերպությանը: Գառնիի երկրաֆիզիկական դիտարանի շենք-շինությունները, աշխարհում եզակիներից համարվող ստորգետնյա (375 մետր երկարությամբ թունելը) դեֆորմոգրաֆը 1990 թվականից առ այսօր չեն վերանորոգվել, գազամատակարարման համակարգ չկա, ջրամատակարարման համակարգը և ճանապարհ ը գրեթե անմխիթար վիճակում են: