Արմեն Աշոտյանի կարծիքով` ֆուտբոլում ևս դերասանի վարպետություն է պետք

Երևանի թատրոնի և կինոյի պետական ինստիտուտում մեկնարկեցին ներբուհական ստեղծագործական քննությունները: ՀՀ կրթության և գիտության նախարար Արմեն Աշոտյանը հունիսի 25-ին մասնակցեց քննությունների մեկնարկին և ոգևորեց բուհ ընդունվողներին: Աշոտյանը ԵԹԿՊԻ-ում դիտեց «Դերասանի վարպետություն» քննության մեկնարկը, որի համար դիմորդները պատրաստել էին էտյուդ և մենախոսություն: Մասնագետները ստուգեցին նաև դիմորդների երաժշտական լսողությունը:

Նախարար Աշոտյանը զրուցեց դիմորդների հետ, հարցրեց, թե դիմորդներից ով է ինքնուրույն պարապել, արդյոք երեկ ֆուտբոլ են դիտել, թե պարապել են: Ստանալով դիմորդներից մեկի՝ ֆուտբոլ դիտելու վերաբերյալ դրական պատասխանը, նախարարը կես կատակ, կես լուրջ նշեց, որ ֆուտբոլում ևս դերասանական վարպետություն է պետք:

ԵԹԿՊԻ ռեկտոր Դավիթ Մուրադյանը քննության մեկնարկին հաջողություն մաղթեց դիմորդներին: «Վստահ եմ, որ մեր հանձնաժողովը կստեղծի այնպիսի մթնոլորտ, որ յուրաքանչյուր դիմորդ կկարողանա ցուցադրել իր ունակությունները՝ հավասար պայմաններում: Նախարարի ներկայությունն այս պատասխանատու աշխատանքը դարձնում է առավել պատասխանատու»,-նշեց Մուրադյանը:

«Ներբուհական բանավոր քննությունների այս տեսակը նույնպես իրականացվում է մեր ընդհանուր հսկողության տակ: Քննություններ են ընթանում նաև այլ բուհերում: Մենք այս ընթացքում գուցե ձեզ հետ այցելենք Ճարտարապետաշինարարարական համալսարան՝ դիտելու գծագրության մրցույթը և կոնսերվատորիա՝ տեսնելու վոկալ և կատարողական արվեստի արվեստի մրցույթը: Քննությունների առաջի փուլն ավարտվել է, որևէ լուրջ դժգոհություն չունենք: Մեզ հաջողվել է հանրային ուշադրության կենտրոնում գտնվող այս գործընթացը կազմակերպել այնպիսի մակարդակով, որը չի հարուցում մեր քաղա քացիների անհանգստությունը»,- լրագրողների հետ զրույցում նշեց Արմեն Աշոտյանը:

Աշոտյանը նշեց, որ քննություների երկրորդ փուլը կկայանա հուլիսի 2-8-ը: Այս փուլին կմասնակցեն բանակից զորացրվածները, սփյուռքից ժամանած երիտասարդները,ինչպես նաև առաջին փուլում հիվանդության պատճառով քննությանը չմասնակցած դիմորդները:

«Կանխվել են նորագույն տեխնիկական սարքերի օգտագործման բազմաթիվ փորձեր: Նման դիմորդներին չենք թույլատրելու մասնակցել քննություններին, որովհետև խաբելու ցանկությունը չի կարող որևէ բանով արդարացված լինել: Մեթոդները տարաբնույթ են, դիմորդները բավականին ստեղծարար են»,-նշեց նախարարը:

Աշոտյանի խոսքով, Թատերականը հետաքրքրություն հարուցող ինստիտուտ է: «Չեմ կարող ասել, որ մրցույթը շատ բարձր է: Մենք այս տարի նույնպես հատուկ ուշադրության կենտրոնում ենք պահելու մշակույթի և արվեստի բուհերում պետական պատվերի ձևավորման գործընթացը, և մեծ հավանականությամբ լավ դիմորդներ ունենալու դեպքում հնարավոր է, որ քննարկվի պետպատվերով հավելյալ տեղեր ստեղծելու հարցը»,- եզրափակեց նախարարը: