ԿԺԴՀ-ում «ահաբեկչության ակտ» են որակել Կիմ Չեն Ընի մասին հոլիվուդյան նոր ֆիլմը

ԿԺԴՀ-ի արտաքին գործերի նախարարությունն «ահաբեկչության բացահայտ ակտ» է որակել հոլիվուդյան նոր կատակերգությունը Հյուսիսային Կորեայի առաջնորդ Կիմ Չեն Ընի սպանության մասին: Այդ մասին հաղորդել է Ռյոնհապ գործակալությունը՝ վկայակոչելով Հյուսիսային Կորեայի զանգվածային լրատվամիջոցները:

«Մենք չեն կարող հանդուրժել ահաբեկչության այս բացահայտ ակտը, երբ ֆիլմում փորձում են հրապարակայնորեն վնաս հասցնել մեր մեծագույն ղեկավարին, վիրավորել մեր ժողովրդին և բանակը և ոչնչացնել մեր վարչակարգը»,- ասված է Հյուսիսային Կորեայի արտաքին քաղաքական գերատեսչության մամուլի ծառայության հաղորդագրության մեջ, որը հունիսի 25-ին հրապարակել է Կորեայի կենտրոնական հեռագրական գործակալությունը:

«Հարցազրույց» ֆիլմը՝ գլխավոր դերակատարներ Սեթ Ռոգենի և Ջեյմս Ֆրանկոյի մասնակցությամբ, պատմում է երկու լրագրողների մասին, որոնք հարցազրույց են վերցնում Կիմ Չեն Ընից, իսկ այնուհետև ԿՀՎ-ի առաջադրանքով իբր սպանում են նրան: Ֆիլմի պրեմիերան պետք է կայանա հոկտեմբերի 14-ին ԱՄՆ-ում:

Փենյանը ֆիլմն ստեղծողներին համարել է «հանցագործներ», որոնք հանդգնել են վիրավորել նրան, ով «բանակի և ժողովրդի համար թանկ է կյանքից», և կոչ է արել՝ թույլ չտալ, որ կատակերգությունը մտնի վարձույթ: Հակառակ դեպքում ԿԺԴՀ-ի ԱԳ նախարարությունն սպառնում է ձեռնարկել «վճռական և անողոք» միջոցներ, հաղորդել է ՌԻԱ Նովոստին: