ԼՂՀ ԱԺ նախագահն ընդունել է ՀՀ արդարադատության նախարարին

ԼՂՀ Ազգային ժողովի նախագահ Աշոտ Ղուլյանը հունիսի 25-ին ընդունել է ՀՀ վարչապետ Հովիկ Աբրահամյանի գլխավորած կառավարական պատվիրակության կազմում Արցախ ժամանած արդարադատության նախարար Հովհաննես Մանուկյանին։ Ինչպես տեղեկացնում են ԼՂՀ Ազգային ժողովի մամուլի ծառայությունից, հանդիպման թեման Արցախի խորհրդարանի և Հայաստանի արդարադատության նախարարության միջև համագործակցության հարցն է եղել։ Գոհունակությամբ արձանագրելով այդ ասպարեզում առկա ձեռքբերումները' ԱԺ նախագահը կարևորել է վաղուց ի վեր ավանդական դարձած փոխգործակցությունն այսուհետ ևս ընդլայնելու խնդիրը, ինչը, նրա խոսքով, բխում է երկու հայկական պետությունների օրենսդրական դաշտերի ինչպես կատարելագործման, այնպես էլ ներդաշնակության ապահովման անհրաժեշտությունից։ «Մենք շահագրգռված ենք ԼՂՀ մի շարք առանցքային օրենքների, առանձին օրենսգրքերի նախագծերը Հայաստանի արդարադատության նախարարության ուժերով մասնագիտական փորձաքննության ենթարկելու հնարավորությամբ»,- նշել է ԱԺ նախագահը:

Իր հերթին նշելով, որ համակարծիք է խնդրո առարկա գաղափարին, Հայաստանի արդարադատության նախարարը պատրաստակամություն է հայտնել ուժերի ներածին չափով նպաստելու խնդրի իրագործմանը: Մտքերի փոխանակության ընթացքում ուրվագծվել են համագործակցության լրացուցիչ ձևերն ու միջոցները, նշվել այդ ուղղությամբ առաջիկա անելիքները:

Հանդիպմանը մասնակցել են ԼՂՀ արդարադատության նախարար Արարատ Դանիելյանը և ԱԺ պատական-իրավական հարցերի մշտական հանձնաժողովի նախագահ Գագիկ Պետրոսյանը։