«Հրապարակ». Ինչու են կարմիր գծերն ու արագաչափերը համարում «անբարոյականություն»

«Զրուցակիցս, որ «հարյուր տարվա» վարորդ է եւ ֆինանսական խնդիրներ էլ չունի՝ այսինքն, կարող է հանգիստ վճարել իրեն «հասնող» տուգանքները, վրդովված բացատրում է, թե ինչու է կարմիր գծերն ու արագաչափերը համարում «անբարոյականություն». «Եթե խնդիրը երթեւեկությունը կարգավորելն է եւ մահվան դեպքերը նվազեցնելը, ապա ոչ մեկի համար չպետք է բացառություններ արվեին՝ անգամ ԱԺ նախագահի, վարչապետի, երկրի նախագահի: Եվ խախտում արած որոշ մեքենաների համարները տուգանվողների միջից «հանելն» անամոթություն է, խոսում է այն մասին, որ գլխավորը փող աշխատելն է»,- գրում է «Հրապարակ»-ը:

Բացի այդ. «Ի՞նչ է նշանակում՝ նույն կարգազանց վարորդին բազում անգամներ տուգանելը: Եթե մեկը ամսվա մեջ 5-10-15 անգամ արագություն է խախտում եւ 5-հազարական դրամներ վճարելով գլուխն ազատում, ու դա որեւէ կերպ չի անդրադառնում նրա վարքի վրա, քանի որ վճարունակ է, եւ եթե մեր խնդիրը նման լկտիներին կարգուկանոն սովորեցնելն է, պետք է 3 անգամվա տուգանքից հետո այլ պատժամիջոցներ մտածեն: Ասենք՝ 6 ամսով զրկել, դատի տալ եւ այլն: Եթե սա չի արվում, նշանակում է, որ խնդիրը ոչ թե երթեւեկությունը կանոնակարգելն է, այլ մարդկանց գրպանը մտնելը, սեփական գրպանը լցնելը»:

Եվ, բնականաբար, խոսակցությունը թեքվում է դեպի քաղաքականություն. «Ռոբերտ Քոչարյանի ժամանակ էլ էին փող աշխատում, բայց մեծ բաներից, մեծահարուստներից ու սոլիդ, ամեն մեկի գրպանը մտնելը Սերժ Սարգսյանի օրոք մտավ մեր կյանք: Դրանից էլ էս համատարած դժգոհությունն ու արտագաղթը: Գազի գին են բարձրացնում, կարմիր գծեր են քաշում, արագաչափեր են դնում, առաջին անհրաժեշտության ապրանքներն են թանկացնում՝ էս բոլորը խփում է շարքային սպառողին, իր գոյությունը հազիվ քարշ տվող մարդուն: Իսկ փոքր ու միջին բիզնեսն ավելի է փոքրանում»:

Շարունակությունը` «Հրապարակ»-ի այսօրվա համարում: