Հեքիաթ հիշեցնող համերգը. անակնկալ հյուրեր, չդադարող ծափեր... (լուսանկարներ)

Երեկ՝ հունիսի 25-ին, Արամ Խաչատրյան մեծ համերգասրահում տեղի ունեցավ իր նմանը չունեցող համերգ. տարբեր սերունդների երեք հանրաճանաչ դաշնակահարներ մեկ բեմում էին. Արմեն Բաբախանյան, Վահագն Հայրապետյան, Տիգրան Համասյան:

Անհանգիստ սպասումով դահլիճը սպասվածի պես լեփ-լեցուն էր:

Առաջինը բեմ բարձրացավ Վահագն Հայրապետյանը և դաշնամուրի հնչյունով տվեց համերգի մեկնարկը, մի քանի րոպե նվագելուց հետո նրան միացավ Տիգրան Համասյանը, իսկ քիչ անց նրանց շարքերը լրացրեց և տրիոն ամբողջական դարձրեց Արմեն Բաբախանյանը:

Ստեղծագործությունները հնչում էին յուրովի մեկնաբանմամբ՝ լիներ Կոմիտաս, Արամ Խաչատրյան, Առնո Բաբաջանյան:

Ամեն բան նախատեսվածից էլ լավ էր: Աննախադեպ համերգն ուղեկցվեց աննախադեպ իրադարձություններով. այդ պահին բեմում միայն Արմեն Բաբախանյանն էր: Նրա ելույթի ժամանակ էր, երբ լույսերն անջատվեցին, միացան ու էլի անջատվեցին, իսկ Բաբախանյանը շարունակում էր նվագել` կարծես ոչինչ չէր պատահել: Վայրկյաններ անց դահլիճը լուսավոր էր, բայց արդեն հանդիսատեսի բջջային հեռախոսների լույսերի շնորհիվ:

Բաբախանյանն ավարտեց նվագել, բուռն ծափեր, և բեմ բարձրացավ Վահագն Հայրապետյանը. նվագելու հերթը նրանն էր, ինչը փոքր-ինչ ուշացավ:

Հանկարծ դահլիճի մեծ պատուհաններն ուժեղ քամուց բացվեցին, բոլորը մի պահ շփոթված վերև էին նայում: Վայրկյաններ անց Վահագն Հայրապետյանը սկսեց նվագել՝ կրկին մութ, նաև փոքր-ինչ թաց դահլիճում: Նույն պայմաններում էր նվագում նաև Տիգրան Համասյանը:

Քիչ անց ամեն բան կարգավորվեց, բջջային հեռախոսների լույսի կարիքն այլևս չկար:

Համերգի վերջում անակնկալ բեմ բարձրացավ հայտնի ջազմեն, կոմպոզիտոր Լևոն Մալխասյանը, ում գեղեցիկ կատարման ընթացքում միացան Արմեն Բաբախանյանը, Վահագն Հայրապետյանը և Տիգրան Համասյանը: Ստացվեց անկրկնելի համար, որին ոչ մեկ չէր սպասում:

Համերգը վերջացավ եռյակի համատեղ ելույթով, որին հաջորդեց դահլիճի բուռն և անվերջանալի թվացող ծափողջույնները: