Հանրության դատին ներկայացվեց Սևանա լճի մասին գիտամշակութային տեղեկատվություն պարունակող եռալեզու կայքը

Սևանա լճի էկոհամակարգի և լճի վրա մարդկային գործունեության ազդեցության մասին այսուհետև համակողմանի գիտական տեղեկատվություն կարելի է ստանալ աշխարհի՝ քաղցրահամ ջուր ունեցող 2-րդ բարձրադիր լճի մասին պատմող կայքում: Հայաստանում Ֆրանսիայի դեսպանությունը և ԿԱԶԱ շվեյցարական մարդասիրական հիմնադրամը մշակել են Սևանա լճին առնչվող գիտամշակութային մի ծրագիր, որը պսակվել է եռալեզու www.sevanlake.am ինտերնետ կայքի ստեղծմամբ: Կայքի մեկնարկը տրվեց հունիսի 26-ին ՀՀ-ում Ֆրանսիական դեսպանատանը: Ինչպես լրագրողներին հայտնեց ՀՀ-ում Ֆրանսիայի դեսպանատան մշակութային և համագործակցության հարցերով խորհրդական Ժան-Միշել Կասբարյանը, պաշտոնական շնորհանդեսը նախատեսվում էր իրականացնել Սևանա լճի ափին' տեղի բնակիչների և երեխաների մասնակցությամբ, սակայն ամառային արձակուրդների պատճառով այն հետաձգվել է մինչև սեպտեմբեր: Շնորհանդեսին ներկա կլինի նաև դեսպան Անրի Ռենոն: Ֆրանսիայի արտաքին գործերի նախարարության կողմից օժանդակվող ծրագրի նպատակն է լայն հանրությանը և մասնավորապես երեխաներին ծանոթացնել Սևանա լճի ֆլորային և ֆաունային, շրջական միջավայրին, հիմնախնդիրներին և լուծումներին:

«Սևանա լիճը Հայաստանի հարստությունն է, որը միաժամանակ բավական բարդ սոցիալական իրողություն է ներկայացնում, քանզի Սևան ասելով հասկանում ենք ոչ միայն լիճը կամ դրան ածանցյալ հարցերը, այլև զբոսաշրջություն, գյուղատնտեսություն, ձկնաբուծություն և պատմամշակութային արժեք ներակայցնող վայր: Ֆրանսիան շրջակա միջավայրի, կլիմայի, բնապահպանության և կենսաբազմազանության պահպանման գործում մեծ փորձ ունեցող առաջատար պետություններից է: 2015 թվականին Փարիզը նաև հյուրընկալելու է կլիմայական հարցերին նվիրված միջազգային համաժողովը»,- ասաց Ժան-Միշել Կասբարյանը:

ԿԱԶԱ հիմնադրամի ներկայացուցիչ Տաթևիկ Բաղդասարյանը ներկայացրեց կայքի բովանդակությունը, որը հայերեն, ֆրանսերեն և անգլերեն լեզուներով համապարփակ տեղեկատվություն է պարունակում լճի պատմության, կենդանական և բուսական աշխարհի, տնտեսության և արդյունաբերության և տեսարժան վայրերի մասին: Կայքն առաջարկում է ուսումնական բովանդակության նյութեր դպրոցականների համար, բացի այդ՝ հավակնում է դառնալ լճի ապագային նվիրված հանրային քննարկումների հարթակ: Նորարարական ուսումնական գործիքները և ինտերակտիվ սեղանի խաղը երեխաների համար մատուցվող տե ղեկատվությունը կդարձնեն ավելի հետաքրքրաշարժ և հեշտ ըմբռնելի:

Կայքի գիտական բովանդակությունը մշակել է Գիտությունների ակադեմիայի ծովային էկոլոգիայի գծով գիտաշխատող Արևիկ Մինասյանը: Կայքի վրա ընդհանուր առմամբ աշխատել են մոտ հինգ մասնագետ, ովքեր վերահսկել են կայքի համապատասխան բաժինները: «Առաջնային նպատակն էր երեխաների մեջ արթնացնել բնապահպանական մոտեցում և պատասխանատվության զգացում Սևանի նկատմամբ»,- ասաց մասնագետը: