Ջուլիան Ասանժը մոդելների հետ հագուստ կցուցադրի Լոնդոնի նորաձևության շաբաթվա ընթացքում

WikiLeaks-ի հիմնադիր Ջուլիան Ասանժը մոդել կդառնա Լոնդոնի նորաձևության շաբաթվա ընթացքում, տեղեկացնում է The Daily Mail-ը:

Ասանժը ևս վեց մոդելների հետ կցուցադրի Վիվիեն Վեստվուդ Բենի ստեղծած հագուստը: Ցուցադրանքին մասնակցելու համար WikiLeaks-ի հիմնադիրը չի հեռանա Լոնդոնում Էկվադորի դեսպանատնից, որտեղ նա գտնվում է արդեն երկու տարի. բարձրահարթակը կկազմակերպեն ուղղակիորեն այնտեղ: Բեն Վեստվուդը պարզաբանել է, որ ցանկանում է այս կերպ աշխարհին հիշեցնել Ասանժի ճակատագրի, մասնավորապես, նրա նկատմամբ կիրառված անարդարության մասին:

Հավաքածուն ստեղծվել է Քլինտ Իստվուդի «սպագետի-վեստեռնների» տարազների ազդեցությամբ, բայց որոշ բաներ ներշնչվել են իր իսկ Ասանժի ոճով, պատմել է Վեստվուդը: Շոուն տեղի կունենա «Լավը, վատը, չարը» ֆիլմի երաժշտության ներքո: Ցուցադրությանը, որը կկայանա սեպտեմբերին, հրավիրված են դերասան Ջորջ Քլունին և նրա հարսնացուն՝ փաստաբան Ամալ Ալամուդինը:

Էկվադորը քաղաքական ապաստան է տրամադրել Ասանժին, սակայն նա չի կարողանում հեռանալ Լոնդոնի դեսպանատնից, որովհետև այդ դեպքում կկալանավորվի և կհանձնվի Շվեդիային, որտեղ նա մեղադրվում է սեռական հանցագործությունների մեջ: Ասանժը կարծում է, որ իրեն Շվեդիայից կարող են արտահանձնել ԱՄՆ, որտեղ նրան խիստ պատիժ է սպառնում WikiLeaks-ի միջոցով գաղտնի տեղեկատվության հրապարակման համար, հաղորդել է «Ինտերֆաքս»-ը: