«Հրապարակ». Թող գետը չորանա, ձկներն էլ բնաջնջվեն

Ինչպե՞ս չմտածենք, որ իշխանության մեջ գտնվողների ծրագիրը մեկն է՝ թալանել, ավերել, ապականել ամեն ինչ ու մի օր հեռանալ, երբ բոլոր փաստերն այդ մասին են խոսում: Երեկ ահազանգ ստացանք Հրազդանի Ջրառատ թաղամասից, որ գետն իրենց տներին մերձակա հատվածում, մոտ 200 մետրանոց մակերեսով ծածկված է սատկած ձկներով: Անշնչացած ձկները լողում են կաթնագույն ջրում, որից վատ հոտ է գալիս: Թե ով է ապականել գետը, այդ ինչ արտանետումների պատճառով են ձկները սատկել, մարդիկ գուշակություններ էին անում: Առողջապահության պետական տեսչության Կոտայքի մարզային կենտրոնից մեր թղթակցին ասել էին. «Քանի որ բնակիչների կողմից ահազանգ չունենք, ձեր տեսանյութը տեղադրեք կայքում, ունենալով փաստեր մեր ձեռքի տակ, համապատասխան միջոցառումներ կձեռնարկենք: Մասնագետներ կուղարկենք, ջրից նմուշներ վերցնեն, ուղարկեն փորձաքննության»:

Իսկ եթե չահազանգեն, թող գետը չորանա, ձկներն էլ բնաջնջվեն: Աֆրիկյանների տան հետ կապված աղմուկը հոգնեցրել է մեր պաշտոնյաներին. երեկ քաղաքաշինության նախարար Նարեկ Սարգսյանը դժգոհել է, թե՝ ասել ենք, որ Տերյան փողոցն ենք ընդլայնում, իսկ այդ շենքն էլ տեղափոխելու ենք եւ նույնությամբ վերականգնելու: Խոսքը «Հին Երեւան» ծրագրի մասին է, որը «անունը կա, ամանում չկա» տարբերակով անընդհատ մատնանշվում է, սակայն ոչ մի քայլ այդ ուղղությամբ չի արվում: Չնայած, եթե անգամ արվի, չի կարող լցնել այն պարապությունը, որը ձեւավորվել է ոմանց ծավալած հակամարդկային ու հակամշակութային քաղաքաշինական գործունեության հետեւանքով: Այն չի կարող մեզ՝ երեւանցիներիս համար փոխարինել Երեւանի յուրօրինակ կոլորիտն ու թամանյանական գողտրիկ միջավայրը, որտեղ մենք սովոր էինք ապրել… մինչեւ վայրագ ցեղերի ասպատակումը:

Շարունակությունը` «Հրապարակ»-ի այսօրվա համարում: