Ձյուդոյի ֆեդերացիայի նախագահը վերընտրվել է

Հայաստանի ձյուդոյի ֆեդերացիայի նախագահ է վերընտրվել նախկին նախագահ Վարդան Ոսկանյանը:

«Արտահերթ նիստ գումարելով` կազմակերպեցինք նոր ընտրություններ: Միայն Վարդան Ոսկանյանի թեկնածությունն էր դրված, և նա միաձայն վերընտրվեց»,- այս մասին լրագրողների հետ հանդիպման ժամանակ ասաց ֆեդերացիայի գլխավոր քարտուղար Դավիթ Խիթարյանը:

Ֆեդերացիայի նախագահ Ոսկանյանը լիահույս է, որ մարզաձևն ավելի կմասսայականանա: «Մենք ցանկություն ունենք ավելի մասսայականացնել ձյուդոն և շեշտը կդնենք մարզերի վրա: Կապեր ենք հաստատել Վրաստանի և Ռուսաստանի ֆեդերացիաների հետ: Մարզիկները հավաքների մեկնեն հենց այդ երկրներ: Հույս ունենք, որ այդ հավաքներն իրենց արդյունքները կտան»,- շեշտեց ֆեդերացիայի նախագահը:

Ֆեդերացիայի գլխավոր քարտուղարի խոսքով` ֆեդերացիան իր պլանավորածի համաձայն է գործում մինչև 2016 թվականի Օլիմպիական խաղերը: «Օլիմպիական խաղերի վերաբերյալ հիմնական աշխատանքներն անում ենք, բայց խնդիրներ կան: Հենց հավաքների վերաբերյալ: Մինչև Ռիոյի Խաղերը նպատակ ունենք 4 ուղեգիր նվաճել»:

Խոսվեց նաև պատանեկան Օլիմպիական խաղերի մեր մասնակիցների, մասնավորապես Հայաստանի ներկայացուցիչ Հարություն Դերմիշյանի մասին: «Նա հասցրել է վերականգնվել և մասնակցել հավաքի: Նախապատրաստվում է Եվրոպայի առաջնությանը: Հավաքների կմեկնի Շվեյցարիա և կլինի նաև Գերմանիայում»,- ասաց Խիթարյանը:

Ֆեդերացիայի ներկայացուցիչները ցանկություն ունեն Հայաստանում անցկացնել պատանիների Եվրոպայի գավաթի խաղարկությունը: «Եթե մեր հնարավորությունները ներեն, հենց հաջորդ տարի միջազգային ֆեդերացիայում կներկայացնենք Երևանի թեկնածությունը»:

ՀՀ սպորտի և երիտասարդության հարցերի նախարարության տվյալներով` Հայաստանում ամենամասսայականն մարզաձևը հենց ձյուդոն է: Մեր երկրում ձյուդոյով զբաղվում են մոտ 4000 մարզիկներ: