Արցախի ամենամեծ հարստությունը ժողովրդի մտավոր ներուժն է. Բակո Սահակյան

Արցախի Հանրապետության նախագահ Բակո Սահակյանը հունիսի 28-ին ուղերձ է հղել «Կրթություն առանց խտրականության. Բոլոնիայի գործընթացի համատեքստում» միջազգային համաժողովի մեկնարկի կապակցությամբ: Ուղերձում ասված է.

«Համաժողովի հարգարժան մասնակիցներ,

Տիկնայք և պարոնայք,

Ի սրտե ողջունում եմ «Կրթություն առանց խտրականության. Բոլոնիայի գործընթացի համատեքստում» միջազգային համաժողովի մասնակիցներին:

Նման միջոցառումների անցկացումն Արցախում' Հայաստանի և արտերկրի ճանաչված գիտնականների ու փորձագետների, կրթության ոլորտի ներկայացուցիչների մասնակցությամբ, պահանջված է և կարևոր: Այսպիսի ձևաչափով քննարկումները հնարավորություն կտան ավելի լայն ու խորացված պատկերացում ստանալ աշխարհում և առաջատար պետություններում կրթության զարգացմանն առնչվող հիմնախնդիրների, դրանց լուծման տարբերակների և մեր հանրապետությունում հաջողված մոտեցումների կիրառման հեռանկարների մասին:

Արցախում հատուկ տեղ է հատկացվում այս կարևորագույն հարցերին, հատկապես' հաշվի առնելով կրթության ու գիտության նշանակությունը մեր երկրի և ժողովրդի կյանքում: Կրթության ոլորտը համարվում է մեր պետության զարգացման ռազմավարական առանցքային ուղղություններից մեկը: Արցախի ամենամեծ հարստությունը մեր ժողովրդի մտավոր ներուժն է, որի զարգացումը և հետևողական կատարելագործումը մեծապես կախված է քաղաքակիրթ հանրության հետ կրթության ոլորտում կայուն կապերի և գործնական շփումների հաստատումից ու պահպանումից: Այսպիսի տեսլականը լիովին համապատասխանում է նաև միջազգային նորմերին, քանի որ որակյալ և անհատի բազմակողմանի զարգացմանը նպաստող կրթությունը հանդիսանում է երկրի առաջընթացի, մարդու հիմնարար իրավունքների և ժողովրդավարության կարևորագույն բաղադրամասերից մեկը:

Համոզված եմ, որ համաժողովն արդյունավետորեն կլուծի իր առջև դրված խնդիրները և օգտակար ազդեցություն կունենա մեր հանրապետությունում կրթության զարգացման գործընթացի վրա: Բոլորիդ մաղթում եմ հաջողություններ ու ամենայն բարիք»:

Լեռնային Ղարաբաղի Հանրապետության կրթության և գիտության նախարարությունը և Արցախի պետական համալսարանը համատեղ կազմակերպել են «Կրթություն առանց խտրականության. Բոլոնիայի գործընթացի համատեքստում» միջազգային համաժողովը: Այն տեղի կունենա հունիսի 27-29-ը ԼՂՀ մայրաքաղաք Ստեփանակերտում: Համաժողովի ավարտին նախատեսվում է մասնակից երկրների և միջազգային փորձագետների հետ համատեղ Համաժողովի հռչակագրի ընդունում: ՀՀ պատվիրակությունը գլխավորում է ՀՀ կրթության և գիտության նախարար Արմեն Աշոտյանը: