Մշակույթի նախարարը շնորհավորել է անվանի դիրիժոր Ջորջ Փեհլիվանյանին՝ հոբելյանի առթիվ

ՀՀ մշակույթի նախարար Հասմիկ Պողոսյանը հունիսի 27-ին ընդունել է ֆրանսահայ անվանի դիրիժոր Ջորջ Փեհլիվանյանին և շնորհավորել է նրան ծննդյան 50-ամյակի կապակցությամբ: Զրույցի ժամանակ ձեռք է բերվել պայմանավորվածություն՝ առաջիկա հանդիպման ընթացքում համատեղ ծրագրերի քննարկման ուղղությամբ:

Աշխարհահռչակ դիրիժոր Ջորջ Փեհլիվանյանը երկարատև բացակայությունից հետո ելույթ կունենա Հայաստանում: Անվանի դիրիժորն իր ծննդյան 50-րդ հոբելյանը կտոնի հայրենիքում՝ յուրահատուկ համերգային երեկոյով: «Սպասված վերադարձ» խորագրով հոբելյանական համերգը տեղի կունենա հունիսի 28-ին, «Արամ Խաչատրյան» համերգասրահում: Համերգին կմասնակցի Կամերային նվագախումբը, որի նախաձեռնությամբ և հրավերով էլ հենց դիրիժորը եկել է հայրենիք: Երեկոյի ընթացքում ունկնդիրը կվայելի Չայկովսկի, Միրզոյան, Կոմիտաս-Ասլամազյան: Ամերիկահայ դիրիժոր Ջորջ Փեհլիվանյանն ավարտել է Լոնգ Բիչի և Ինդիանայի համալսարանները՝ստանալով ջութակահարի և դիրիժորի վկայականներ: Հանդես է եկել իբրև մենակատար և Ինդիանայի «ՊրոՄյուզիք» նվագախմբի կոնցերտմայստեր: 1991թ. սեպտեմբերին մասնակցել է Բեզանսոնի (Ֆրանսիա) դիրիժորների միջազգային մրցույթին՝ արժանանալով առաջին և միակ մրցանակին: Ֆրանսիական «Մոնդ», «Ֆիգարո» և այլ թերթեր նրա մասին մասին գրել են.«Փեհլիվանյանը գյուտ է, որին պետք է հետևել, նա անուրանալի անհատականություն է, որն իր տաղանդով գերազանցեց մրցակիցներին»: