Բաքվում մեկնարկել է ԵԱՀԿ ԽՎ նստաշրջանը
Արտաքին Քաղաքական
Ադրբեջանի մայրաքաղաք Բաքվում մեկնարկել է ԵԱՀԿ Խորհրդարանական վեհաժողովի 23-րդ նստաշրջանը: Այս մասին տեղեկացնում է ադրբեջանական «ԱՊԱ» գործակալությունը: Ելույթով հանդես է եկել ԵԱՀԿ ԽՎ նախագահ Ռանկո Կրիվոկապիչը, ով իր խոսքում նշել է, որ ԵԱՀԿ ԽՎ-ն խորհրդանական ժողովրդավարության աղբյուր է: Նա հավելել է նաև, որ այստեղ բոլոր քաղաքական գործընթացները պետք է ճիշտ ընթանան:
ԵԱՀԿ Խորհրդարանական վեհաժողովի քաղաքական և անվտանգության հարցերով հանձնաժողովը ներկայացրել է զեկույց, որում ներառված չի եղել Լեռնային Ղարաբաղի հակամարտությունը, ինչպես նաև Վրաստանում և Մոլդովայում առկա հիմնախնդիրները: Փոխարենը մեծ տեղ է հատկացվել Ղրիմի` Ռուսաստանին միանալու իրողությանը:
Փաստաթղթում նշվում է, որ ահաբեկչությունը, կիբեր-պատերազմը, անօդաչու սարքերի կիրառումը ժամանակակից քաղաքականության անբեկանելի մասն են դարձել, հետևաբար դրանք ստեղծում են համապատասխան հակազդեցության առաջացման անհրաժեշտ հրամայականը:
ԵԱՀԿ ԽՎ նիստին մասնակցում է նաև հայկական պատվիրակությունը, որը ղեկավարում է Արտաշես Գեղամյանը: Պատվիրակության կազմում են նաև ԱԺ ՀՅԴ խմբակցության քարտուղար Աղվան Վարդանյանը, ԲՀԿ խմբակցության պատգամավոր Ստեփան Մարգարյանը, ինչպես նաև մեկական ներկայացուցիչներ ՀՀ ԱԳՆ-ից և ԱԺ միջազգային կապերի բաժնից:
ՈՒՂԻՂ ԵԹԵՐ
Ամենադիտված 
Դերասանին մեղադրում են մանկապղծության մեջ․ նա ձերբակալվել է
