Հայաստանում թրաֆիքինգի դեմ պայքարին ուղղված ջանքերը շարունակվելու են

ՀՀ փոխվարչապետ, Հայաստանում մարդկանց շահագործման (թրաֆիքինգի) հարցերով խորհրդի նախագահ Արմեն Գևորգյանն այսօր ընդունեց Խորհրդին կից միջգերատեսչական աշխատանքային խմբում ընդգրկված հասարակական կազմակերպությունների ղեկավարներին: Ինչպես «Արմենպրես»-ին տեղեկացրին Տարածքային կառավարման նախարարության հասարակայնության հետ կապերի բաժնից, փոխվարչապետը նախ շնորհակալություն հայտնեց համատեղ աշխատանքի համար՝ ընդգծելով, որ ձևավորված արդյունավետ համագործակցության շնորհիվ է նաև, որ ԱՄՆ պետքարտուղարության մարդկանց թրաֆիքինգի մասին 2014թ. զեկույցում Հայաստանը կրկին տեղ է գտել ամենաբարձր՝ առաջին խմբում: «Սա նաև հասարակական հատվածի կազմակերպությունների հետ ձևավորված աշխատանքի արդյունք է: Մենք, սակայն, չենք բավարարվելու արձանագրված արդյունքներով և շարունակելու ենք երևույթի դեմ պայքարին ուղղված մեր ջանքերը՝ այդ գ ործում որպես կարևոր գործընկեր ունենալով հասարակական կազմակերպություններին»,-նշեց փոխվարչապետը:

Հանդիպմանը քննարկվեցին ԱՄՆ պետքարտուղարության մարդկանց թրաֆիքինգի մասին 2014թ. զեկույցում արտացոլված՝ հասարակական կազմակերպությունների հետ համագործակցությանը վերաբերող առաջարկությունների իրականացման հետ կապված հարցեր: Պայմանավորվածություն ձեռք բերվեց, որ զեկույցն առաջիկայում կքննարկվի Խորհրդին կից միջգերատեսչական աշխատանքային խմբում՝ առաջարկությունների իրականացման միջոցառումների ծրագիր մշակելու համար: Օրենսդրական լուծումների անհրաժեշտության դեպքում նաև համապատասխան առաջարկություններ կներկայացվեն կառավարությանը:

Հայաստանն արդեն երկրորդ տարին է ընդգրկվում ԱՄՆ պետքարտուղարության մարդկանց թրաֆիքինգի մասին զեկույցի՝ երկրների դասակարգման սանդղակի ամենաբարձր խմբում: Մինչ այդ տեղ էր զբաղեցնում երկրորդ խմբում: