«Ժառանգության» համագումարն ընտրեց կուսակցության վարչության 15 անդամներին

«Ժառանգության» անդամները կուսակցության 10-րդ համագումարի ընթացքում փակ քվեարկության արդյունքում հաստատեցին կուսակցության նոր վարչության կազմը: Քվեարկության արդյունքներով կուսակցության վարչությունում ընդգրկվել են' Աբասյան Գայանե, Արզումանյան Ֆիլիպ, Բախշյան Անահիտ, Գրիգորյան Անդրանիկ, Հակոբյան Ռուբեն, Հասան-Ջալալյան Ստեփան, Հովհաննիսյան Վահագն, Հովհաննիսյան Րաֆֆի, Ղազարյան Հովսեփ, Մանուկյան Հրայր, Մարգարյան Գագիկ, Մարտիրոսյան Արմեն, Մարտիրոսյան Ռշտուն, Մուրադյան Սուսաննա, Փոստանջյան Զարուհի: Քվեարկության արդյունքները ներկայացրեց «Ժառանգություն» կուսակցության հաշվիչ հանձնաժողովի անդամ Դավիթ Սանասարյանը:

Քվեարկության արդյունքների ամփոփումից հետո, կուսակցության առաջնորդ Րաֆֆի Հովհաննիսյանը շնորհավորեց վարչության նոր անդամներին՝ ընդգծելով, որ նրանց ծանր աշխատանք է սպասվում: «Ես ցանկանում եմ, որպեսզի մենք ավելի ակտիվացնեք մարզային հանդիպումները քաղաքացիների հետ: Այնպես որ, մեզ ծանր աշխատանք է սպասվում, քանի որ պետք է պատրաստվենք նաև նոր քաղաքական իրադրությանը, որը ես կարծում եմ՝ այնքան էլ չի ուշանալու»,- ասաց նա:

Մինչ քվեարկությունը «Ժառանգություն» կուսակցության անդամները հաստատել էին կառուցվածքի և կառավարման գծով մի շարք կանոնադրական փոփոխությունները, ըստ որոնց' վարչության անդամների թվակազմն ընդլայնվեց՝ 11-ից դառնալով 15:

Սահմանել էր նաև, որ ՀՀ իշխանության ներկայացուցչական մարմիններում, մասնավորապես Ազգային ժողովում և Երևանի ավագանիում «Ժառանգություն» խմբակցությունների ղեկավարները կուսակցության վարչության նիստերին մասնակցում են խորհրդակցական ձայնի իրավունքով, եթե վարչության ընտրված անդամներ չեն:

Կուսակցության վարչության անդամներնն ընտրվել են համագումարի կողմից գաղտնի քվեարկությամբ և երկու տարի ժամկետով:

«Ժառանգության» համագումարին ներկա կուսակցության անդամները միաձայն կողմ քվեարկեցին և հաստատեցին կանոնադրական փոփոխությունները: Ներկաները քվեարկությամբ հաստատեցին նաև կանոնադրական հանձնաժողովի և վերստուգիչ հանձնաժողովների փոփոխությունները: