Գյումրիում մեկնարկեց Հայաստանի Դուքենդո ֆուլ կոնտակտ կարատեի Գյումրու առաջնությունը

Գյումրիում հունիսի 29-ին մեկնարկեց Հայաստանի Դուքենդո ֆուլ կոնտակտ կարատեի Գյումրու առաջնությունը: Առաջնությանը մասնակցում է ավելի քան 400 մարզիկ հանրապետության բոլոր մարզերից: Առաջնությունն անցկացվում է տարիքային և քաշային տարբեր խմբերում: Մրցաշարն ուղեգրային է՝ առաջին և երկրորդ տեղերը գրաված մարզիկները հնարավորություն կսատանան մասնակցելու Հայաստանի առաջնությանը, որը կայանալու է նոյեմբերին՝ Երևանում:

Այն, որ Դուքենդոն այսօր մասսայական է, խոսում են թվերը. հանրապետությունում այս մարտարվեստով զբաղվում է շուրջ 6 հազար մարդ: «Բացի սպորտային հաջողություններ գրանցելուց, շատ կարևոր է հայրենասիրության սերմանումը, և դա է պատճառը, որ նմանատիպ առաջնություններ կազմակերպվում են հանրապետության մյուս քաղաքներում: Գյումրին մշակութային և մարզական քաղաք է, և այսպիսի առաջնություններ պետք է նաև Գյումրիում անցկացվեն: Բացի այս առաջնությանը մասնակցելուց, Գյումրի այցելած մարզիկների համար կկազմակերպվեն ճանաչողական այցեր Գյումրիում, ինչը ֆեդերացիան շատ է կարևորում: Ի դեպ, Գյումրին հաջողություններ ունի նաև Դուքենդոյից՝ գյումրեցի մարզիկներ Արտակ Գյոլեցյանն ու Կառլեն Մինասյանը աշխարհի չեմպիոններ են: Այսօր մարզում դուքենդո կարատեով զբաղվում է ավելի քան 300 մարզիկ»,- «Արմենպրես»-ին տեղեկացրեց Հայաստանի Դուքենդո ֆուլ կոնտակտ կարտեի ֆեդերացիայի նախագահ Հայկ Վարդանյանը:

Առաջնության բոլոր լավագույն մասնակիցներն արժանացան մեդալների և պատվոգրերի: Առաջնության կազմակերպմանն աջակցելու համար շնորհակալագրերի արժանացան նաև մարզային և քաղաքային իշխանությունների ներկայացուցիչները: «Երբ զգում ես աջակցություն պետական այրերի կողմից, շատ ես ոգևորովում: Գյումրիում մենք զգացինք Շիրակի մարզպետի և Գյումրու քաղաքապետի աջակցությունը, ինչը շատ ուրախալի է»,- նշեց Հայկ Վարդանյանը: