«Հայաստանը մեր դաշնակիցն է, իսկ Ադրբեջանն`ընկերն ու հարևանը». Ալեքսեյ Պուշկով

ՌԴ Պետդումայի միջազգային հարցերով կոմիտեի նախագահ Ալեքսեյ Պուշկովի գնահատմամբ Ռուսաստանը ԼՂ հակամարտության խաղաղ կարգավորման համար կանի ամեն հնարավորն, ինչն ընդունելի կլինի հակամարտող կողմերի համար: Սակայն աջակցել միայն կողմերից որևէ մեկին Ռուսաստանը չի կարող:

«ԼՂ հակամարտությունը շատ բարդ հարց է, ես կասեի՝ նախկին խորհրդային տարածքի ամենաբարդ հակամարտությունը: Այստեղ չկա սովորական լուծում: Ռուսաստանն իր կողմից կարող է միայն կոչեր կատարել, որպեսզի կողմերը գտնեն միմյանց համար ընդունելի որոշում: Հասկացեք, Հայաստանը մեր դաշնակիցն է, իսկ Ադրբեջանը մեր ընկերն ու հարևանը. հենց այդ պատճառով Ռուսաստանը չի կարող աջակցել կողմերից որևէ մեկին»,- Բաքվում ԵԱՀԿ Խորհրդարանական վեհաժողովի ամառային նստաշրջանի շրջանակներում haqqin.az-ին տված հարցազրույցում ասել է Պուշկովը:

Անդրադառնալով ԵՏՄ-ին Ադրբեջանի անդամակցության հետ կապված տարատեսակ մեկնաբանություններին, Պուշկովը նշել է, որ Ադրբեջանն ինքը պետք է որոշի, թե որ ուղղությամբ ինտեգրվի:

«Շատ սխալ է, երբ այս կամ այն պետությանն ստիպում են անդամակցել որևէ միջազգային կառույցի, քանի որ յուրաքանչյուր երկիր ինքն է ընտրում՝ ինչ ձևաչափով մասնակցել այս կամ այն կազմակերպության աշխատանքներին: Երևի Ադրբեջանի ղեկավարությունը կարծում է, որ դեռ ժամանակը չէ անդամակցելու ԵՏՄ-ին, և մենք հարգանքով ենք վերաբերում այդ տեսակետին: Ինչպես ֆրանսիացիներն են ասում, եկեք ժամանակ տանք ժամանակին: Ամեն ինչի ժամանակն էլ կգա: եթե Ադրբեջանը որոշի՝ ապա կանդամակցի, եթե ոչ, ապա ոչ»,- նշել է Պուշկովը: