«Հրապարակ». «Ինձ թվում ա, մեր վարչապետին՝ Արգամիչին, բոլորս ենք մերձավոր»

Լոռու փոխմարզպետ Վանիկ Ասատրյանը (մականունը՝ Հավ) չի հասկանում, թե ինչով պետք է Լոռու մարզը համարվի աղքատ մարզ, եւ կարծում է, որ մի շարք տնտեսական ցուցանիշներով, հատկապես գյուղատնտեսական, Լոռին բավականին լավ վիճակում է գտնվում։
«Ես չեմ հասկանում, թե ինչն է աղքատը, որ ավանդներ չունի, նա՞ է աղքատ, թե՞ որ կարողանում է իր ամենօրյա հացն իր հողից, իր սեփական տարածքից վաստակի, գոյատեւի իր անասնապահությամբ, քանի որ Լոռու մարզում, հատկապես Սպիտակի տարածաշրջանում, շատ զարգացած է եւ հողագործությունը, եւ անասնապահությունը»,-ասաց նա։ Փոխմարզպետը համաձայն չէ նաեւ այն մտքին, թե իրենց մարզից բնակչությունն արտագաղթում է սոցիալական վատ պայմանների պատճառով։ Ըստ նրա՝ մարդիկ ավելի շատ արտագնա աշխատանքի են գնում, քան արտագաղթում են։

«Ես չեմ հերքում Ձեր ասածը եւ չեմ էլ ասում, որ արտագաղթ չկա, բայց մեծամասամբ մեր մարզում արտագնա աշխատանքի են գնում։ Արտագաղթի պրոբլեմը միայն մեր մարզում չէ, դա աշխարհով մեկ ա արտագաղթ»,-վստահեցրեց նա։

Վանիկ Ասատրյանը, որպես ապրուստի հիմնական միջոց Ալավերդու շրջանում, նշեց նաեւ հանքարդյունաբերությունը, բայց չցանկացավ խոսել բնապահպանական վնասների ու մարզի էկոլոգիական ցուցանիշների մասին։ Ինչ վերաբերում է նոր կառավարության ու վարչապետի խոստումներին, ապա դրանք, ըստ Վանիկ Ասատրյանի, ուղղված են ոչ թե աշխատատեղերի բացմանը, այլ դրանց աջակցմանը։
«Սպիտակում մինչեւ սեպտեմբեր կբացվի երկու աշխատավայր՝ կարի ֆաբրիկա եւ թռչնաբուծական ֆերմա, որոնք միասին կապահովեն մինչեւ

300 աշխատատեղ»,-ասաց նա։ Վանիկ Ասատրյանն իրատեսական է համարում նոր կառավարության ու վարչապետի ծրագրերն ու խոստումները, բայց չի ցանկանում գնահատական տալ նախորդ կառավարության գործունեությանը, նշելով, որ փաստ պետք է ունենալ՝ ասելու համար, որ նախորդ կառավարությունը ձախողված կառավարություն է եղել։

Դիտարկմանը, թե վարչապետը խոստացել է իր մերձավորներից սկսել ու բոլորին հարկային դաշտ բերել, արդյոք հնարավո՞ր է Հայաստանում նման բան, Լոռու փոխմարզպետն ասաց. «Ինձ թվում ա, մեր վարչապետին՝ Արգամիչին, բոլորս ենք մերձավոր, որովհետեւ իրա քաղաքացիներն ենք։ Ես էդ բառը չեմ կարա տարանջատեմ, էլի, իրավունք էլ չունեմ տարանջատեմ։ Մերձավորն ի՞նչն ա, իմ հարազատը, իմ եղբայրը, իմ ընկերը եւ իմ քաղաքացին իմ մերձավորն ա»։

Հարցին, թե վերջին թանկացումները՝ գազ, շուտով նաեւ էլեկտրաէներգիա եւ այլ ապրանքներ, արդյոք չե՞ն նպաստի Լոռու մարզում արտագաղթի ցուցանիշի բարձրացմանը, Վանիկ Ասատրյանն ասաց. «Եթե խոսքը գնում է այն առարկայի, այն իրի, այն գույքի մասին, որն ամենօրյա օգտագործելու ա, միանշանակ, ընտանիքի բյուջեին վատ է անդրադառնալու»։ Ձեր վրա է՞լ է վատ անդրադառնում: «Ի՞նչ տարբերություն։ Ես 150 հազար դրամ աշխատավարձ եմ ստանում, հիմա, փառք Աստծու, գոնե հուլիսի 1-ից բարձրանալու են աշխատավարձերը»,-ասաց Լոռու փոխմարզպետը՝ նշելով, որ իրենց տանը միայն ինքը չի աշխատում, իր ընտանիքի անդամներն էլ են աշխատավարձ ստանում։

ՀԳ. Նշենք, որ ընդամենը 150 հազար դրամ աշխատավարձ ստացող Լոռու փոխմարզպետը մեր հարցազրույցից հետո հեռացավ ավելի քան 15 մլն դրամ արժողությամբ 7-րդ սերիայի BMW-ով, որի միայն վառելիքի եւ շահագործման ծախսերը, միջին հաշվարկով, ամսական 100-150 հազար դրամ են կազմում։

Շարունակությունը` «Հրապարակ»-ի այսօրվա համարում: