Խոշոր վթար Երևան-Սևան ճանապարհին. վեց տուժածներից երեքի վիճակը ծանր է

ՀՀ ԱԻՆ-ում հունիսի 30-ին' ժամը 21.29-ին, տեղեկատվություն է ստացվել, որ Կոտայքի մարզի Հրազդան քաղաքի ճանապարհային ոստիկանության պահակակետի մոտակայքում տեղի է ունեցել ՃՏՊ, տուժածները տեղախոխվել են բժշկական կենտրոն. անհրաժեշտ է կատարել ավտոճանապարհի լվացման աշխատանքներ: Դեպքի վայր է մեկնել մեկ մարտական հաշվարկ: Ինչպես տեղեկացնում են ՀՀ արտակարգ իրավիճակների նախարարությունից, դեռևս չբացահայտված հանգամանք ներում «Մ-4» միջպետական ավտոճանապարհի Երևան-Սևան հատվածի 40-րդ կմ-ի մոտակայքում՝ նախկին պետավտոտեսչության հենակետի մոտ, բախվել են «Տոյոտա կոռոլլա» մակնիշի և «Աուդի» մակնիշի 35 ՍD 179 պետհամարանիշի ավտոմեքենաները:

Բախման հետևանքով «Տոյոտա կոռոլլա» մակնիշի ավտոմեքենայի անձնակազմը' Բ. Կ.-ն (ծնվ.1972թ.), Ա. Մ.-ն (ծնվ.1984թ.), «Աուդի» մակնիշի ավտոմեքենայի վարորդ, Ռ. Տ.-ն (ծնվ. 1984թ.), ուղևորներ Ս. Ա.-ն (ծնվ.1991թ.), Ռ. Մ.-ն (ծնվ.1960թ.) և Ա. Տ.-ն (ծնվ.1989թ.) տարբեր մարմնական վնասվածքներով տեղափոխվել են Հրազդան քաղաքի բժշկական կենտրոն, այնուհետև Ս. Ա.-ն տեղափոխվել է Երևան քաղաք' 1-ին համալսարանական հիվանդանոց:

Բժիշկները Բ. Կ.-ի, Ա.Մ.-ի, Ա. Տ.-ի առողջական վիճակները գնահատել են բավարար, իսկ Ռ.Մ.-ի, Ռ.Տ.-ի և Ս.Ա.-ինը՝ ծանր: Հրշեջ-փրկարարներն իրականացրել են ավտոճանապարհի լվացման և մաքրման աշխատանքներ: