Ոստիկանները փակել են ակտիվիստների ճանապարհը (լուսանկարներ)

Սարյան փողոցում՝ Հանրային ծառայությունները կարգավորող հանձնաժողովի շենքի մոտ, մեկնարկել է էլեկտրաէներգիայի թանկացման դեմ բողոքի ակցիան: 

Հավաքվել են տասնյակ քաղաքացիներ, որոնց թվում են ՕԵԿ խմբակցության պատգամավորները, «Ժառանգության» փոխնախագահ Արմեն Մարտիրոսյանը, Երևանի ավագանու «Բարև Երևան» խմբակցության անդամ Ստյոպա Սաֆարյանը, ԱԺ «Ժառանգություն» խմբակցության պատգամավոր Զարուհի Փոստանջյանը, ՀՅԴ խմբակցության պատգամավոր Արծվիկ Մինասյանը, «Բարգավաճ Հայաստան» խմբակցության պատգամավոր Էլինար Վարդանյանը, ԱԺ ՀԱԿ խմբակցության ղեկավար Լևոն Զուրաբյանը:

Ոստիկանները փակել են դեպի ՀՀ Հանրային ծառայությունները կարգավորող հանձնաժողովի շենք տանող աստիճանները:

Երևանի փոխոստիկանապետ Վալերի Օսիպյանն առաջարկեց կազմել փոքրիկ խումբ, ովքեր կբարձրանան նիստերի դահլիճ, սակայն ակտիվիստ Արգիշտի Կիվիրյանը հայտարարեց, որ Հանձնաժողովի նիստին իրավունք ունեն ներկա գտնվելու բոլորը և իրենք բոլորով կբարձրանան շենք: 

Հիշեցնենք, որ երեկ «Կանխենք էլեկտրաէներգիայի թանկացումը» նախաձեռնությունը հայտարարություն էր տարածել, որում տեղեկացնում էր այսօր կայանալիք ակցիայի մասին. «Երեքշաբթի` 11:00-ին տեղի է ունենալու հանձնաժողովի նիստ, քննարկվելու է էլեկտրաէներգիայի թանկացումը, հավանաբար կայացվելու է վերջնական ՈՐՈՇՈՒՄ, ՈՐԻ ՀԻՄՔԵՐԸ ՉԿԱՆ: Մենք պետք է մեր ԲՈՂՈՔԸ արտահայտենք, ՃՆՇՈՒՄ գործադրենք - ԿԱՆԽԵՆՔ անօրինական որոշման ընդունումը»,- ասված էր հայտարարության մեջ: