«Հայաստանը ՀԱՊԿ-ում ամենափորձառուն է խաղաղապահ գործունեության առումով». Սեյրան Օհանյան

Երկու օր շարունակ միջազգային ռազմական կառույցների ներկայացուցիչները, Հայաստանում հավատարմագրված միջազգային կազմակերպությունների ներկայացուցչությունների ղեկավարները կմասնակցեն «ՄԱԿ-ի սկզբունքների և ստանդարտների հիման վրա ազգային և տարածաշրջանային խաղաղարարական ներուժերի ինտեգրումը խաղաղ օպերացիաների համընդհանուր համակարգում» թեմայով միջազգային ռազմավարական քաղաքական ֆորումին:

Ֆորումի կազմակերպիչներն են՝ ՀՀ պաշտպանության նախարարության Ազգային ռազմավարական հետազոտությունների ինստիտուտը, Հավաքական անվտանգության պայմանագրի կազմակերպության քարտուղարությունը, ՀԱՊԿ-ի Միացյալ շտաբը, ՀԱՊԿ-ի գիտափորձագիտական խորհուրդը, ՌԴ ԱԳՆ-ի Միջազգային հարաբերությունների Մոսկվայի պետական ինստիտուտի (Համալսարան) կազմում գործող Եվրաատլանտյան անվտանգության կենտրոնը, Քաղաքական գիտության ռուսաստանյան ասոցիացիան, Քաղաքական գիտության Հայաստանի ասոցիացիան:

Ֆորումի մեկնարկին ՀՀ պաշտպանության նախարար Սեյրան Օհանյանը հանդես եկավ զեկույցով՝ հիմնականում անդրադառնալով Հայաստանի մասնակցությանը միջազգային խաղաղապահ գործողություններին և ՀԱՊԿ-ի անդամակցությանը: Նախարարի գնահատմամբ' Հայաստանը ՀԱՊԿ անդամ երկրների շարքում խաղաղապահ գործունեության առումով ամենափորձառուն է և բազմակողմանիորեն նպաստում է ՀԱՊԿ շրջանակներում խաղաղապահ ուժերի կայացմանը:

«Խաղաղապահության հարցում մեր փորձն ամեն օր կուտակվում է 800 կմ երկարությամբ սահմանի պաշտպանության ընթացքում, որտեղ ՀՀ զինված ուժերը պահպանում են խաղաղությունը և թույլ չեն տալիս ռազմական գործողությունների վերսկսումը, ինչը շատ կարևոր է տարածաշրջանի համար»,- ընդգծեց Սեյրան Օհանյանը:

ՀՀ ՊՆ Ազգային ռազմավարական հետազոտությունների ինստիտուտի տնօրեն, գեներալ-մայոր Հայկ Քոթանջյանն էլ կարևորեց Լեռնային Ղարաբաղի Հանրապետութունում իրականացվող պետականաշինությն գործընթացը՝ որպես տարածաշրջանում խաղաղության և կայունության ապահովման կարևոր գործոն: