Պետական բյուջեի եկամուտներն աճել են 6 տոկոսով

ՀՀ պետական բյուջեի եկամուտները 2014 թվականի հունվար-մայիսին կազմել են 433.4 մլրդ դրամ, իսկ ծախսերը՝ 414.8 մլրդ դրամ, որոնք համապատասխանաբար 79.7 տոկոսով և 73.6 տոկոսով ապահովել են ՀՀ կառավարության առաջին կիսամյակի ծրագրի կատարումը:

Ինչպես տեղեկացրին ՀՀ ֆինանսների նախարարության տեղեկատվության և հասարակայնության հետ կապերի բաժնից, ապահովվել է պետական բյուջեի ծախսային ծրագրերի շրջանակներում առաջին կիսամյակում պետական մարմինների կողմից սահմանված կարգով ստանձնած պարտավորությունների ամբողջական կատարումը:

Անցյալ տարվա հունվար-մայիսի համեմատ պետական բյուջեի եկամուտներն աճել են 6 տոկոսով կամ 24.6 մլրդ դրամով, որն ապահովվել է հիմնականում հարկային եկամուտների և այլ եկամուտների գծով մուտքերի աճի հաշվին:

Պետական բյուջեի եկամուտների 94.1 տոկոսը ձևավորվել է հարկային եկամուտների և պետական տուրքերի, 5.8 տոկոսը՝ այլ եկամուտների, 0.1 տոկոսը՝ պաշտոնական դրամաշնորհների հաշվին: 2014 թվականի հունվար-մայիսին ՀՀ պետական բյուջե են մուտքագրվել 408 մլրդ դրամ հարկային եկամուտներ և պետական տուրքեր, որոնք կազմել են կիսամյակային ծրագրի 80.6 տոկոսը. 2013 թվականի նույն ժամանակահատվածի համեմատ նշված եկամուտներն աճել են 4.8 տոկոսով կամ 18.6 մլրդ դրամով:

Այս տարվա հունվար-մայիսին ՀՀ պետական բյուջեի ծախսերը նախորդ տարվա նույն ժամանակահատվածի համեմատ աճել են 9.8 տոկոսով կամ 37.2 մլրդ դրամով, ինչը պայմանավորված է ընթացիկ ծախսերի աճով:

Այդ ամիսների ընթացքում ՀՀ պետական բյուջեն կատարվել է ավելի քան 18.6 մլրդ դրամ հավելուրդով՝ առաջին կիսամյակի ճշտված ծրագրով նախատեսված 19.9 մլրդ դրամ պակասուրդի դիմաց: Առաջին կիսամյակի ծրագրով նախատեսվել էր պակասուրդի ներքին աղբյուրներում ձևավորված ազատ միջոցներից օգտագործել 84.3 մլրդ դրամ, սակայն բյուջետային ելքերի համեմատ մուտքերի առավել բարձր կատարողականի արդյունքում օգտագործվել է ընդամենը 44.5 մլրդ դրամ:

Պետական բյուջեի եկամուտներում, ծախսերում և պակասուրդի ֆինանսավորման աղբյուրներում ներառված չեն արտաքին աղբյուրներից ֆինանսավորվող նպատակային ծրագրեր իրականացնող գրասենյակներով շրջանառվող միջոցները: