Կարկուտն էական վնաս է հասցրել Շիրակի մարզի համայնքներին

Շիրակի մարզպետ Ֆելիքս Ցոլակյանի հանձնարարականով ձևավորված հատուկ հանձնաժովն ուսումնասիրում է հունիսի 30-ին տեղի ունեցած ուժեղ կարկուտի վնասները: Աղետը էական վնաս է հասցրել մարզի 13 համայնքի: Հունիսի 30-ի ժամը 16:00-ի սահմաներում սկսված տեղատարափ, խոշոր կարկուտը որոշ համայնքներում տևել է մոտ 50 րոպե, մեծ է եղել նաև քամու արագությունը, ինչի հետևանքով վնասվել են հիմնականում հացահատիկային մշակաբույսերի ցանքատարածությունները: Ինչպես «Արմենպրես»-ին տեղեկացրեց Շիրակի մարզպետարանի գյուղատնտեսության վարչության պետ Մովսես Մանուկյանը, նախնական ուսումնասիրությունների համաձայն` որոշ համայքներում կարկուտը հացահատիկային մշակաբույսերի ցանքերը վնասել է 100 տոկոսի չափով: Կարկուտը շատ համայնքներում վնասել է նաև տնամերձ այգիները: Հիմնականում տուժել են մարզի նախկին Անիի տարածաշրջանի Իսահակյան, Լուսաղբյուր, Գուսաննա գյուղական համայնքները, Մարալիկ քաղաքը և Արթիկի տարածաշրջանի՝ Հայրենյաց, Հայկասար, Հոռոմ, Տուֆաշեն, Պեմզաշեն, Նահապետավան, Հառիճ, Սարալանջ գյուղական համայնքները և Արթիկ քաղաքը: «Մարզպետարանում ձևավորվել է 2 հանձնաժողով, որոնք աշխատում են երկու ուղղություններով: Ուսումնասիրությունները կշարունակվեն նաև հուլիս 2-ին: Ամփոփ տվյալները կհստակեցվեն 2 օրից, բայց այսօր իսկ կարելի է ասել, որ ընդհանուր հաշվարկով, վնասվել են հիմնականում աշնանացան ցորենի և գարնանացան գարու շուրջ 1500-2000 հա ցանքատարածություններ: Կան համայնքներ, որտեղ վնասը հասնում է 100 տոկոսի: Սա այս տարվա համար գյուղատնտեսական մշակաբույսերը պատուհասած առաջին խոշոր աղետն էր` այն դեպքում, երբ մոտ 15 օրից հացահատիկի բերքահավաք պետք է սկսվեր»,- նշեց Մով սես Մանուկյանը: Հանձնաժողովներն ուսումնասիրության արդյուքները կներկայացնեն ՀՀ կառավարությանը: Ավելացնենք, որ կարկտահարված տարածքներում հակակարկտային կայաններ տեղադրված չեն: